Orguyoso di nos isla

Na Boneiru bo no tin mester di splika kiko ta orguyo. Bo ta mir’é. Den e awa blou hundu di laman. Den e palma sabal ku akinan só ta krese den mondi. Den e palunan di mangel ku ta protehá piská yòn, promé ku nan drenta den laman ganchu. Nos naturalesa ta karga koló, forsa i outentisidat di Boneiru.

Ku e kampaña di konsientisashon ‘Nos ta biba di naturalesa’ nos ta mustra loke Boneiru por ta orguyoso di dje: naturalesa ku ta briya, sitionan ku ta pertenesé na nos i hende ku ta kuida nan isla bon.

Esensia di e kampaña

Orguyo ta kuminsá ku rekonosementu di loke ta balioso. E laman ku ta duna nos isla koló. E palunan di mangel ku ta protehá nos kosta. E palma sabal ku niun otro kaminda no ta krese den mondi. Tera, aire, awa i lus ta hasi Boneiru loke e ta.

Ku e kampaña ‘Nos ta biba di naturalesa’ nos ta mustra ku orguyo no ta solamente den palabra. Orguyo bo ta mira den kon nos ta anda ku nos alrededor. Den un kosta limpi. Den koral ku ta krese di nobo. Den mata ku ta saka rais. Den habitantenan ku ta lora nan manga di kamisa, pasobra e isla akí ta di nos tur. Pa e motibu akí orguyo ta sentral den e kampaña akí. Pasobra esun ku ta orguyoso di Boneiru, ta wak su alrededor na un otro manera. Bo ta mira loke ta meresé protekshon. Bo ta sinti loke ta pertenesé na nos. I den eskohonan chikitu bo ta laga tur hende mira: nos ta biba di naturalesa.

Na unda bo ta mira e kampaña

E imágennan di e kampaña ta visibel tur kaminda den luna di yanüari, febrüari i mart: den korant, riba billboard digital, riba pantaya den establesimentunan, den aviso ònlain i den bo ‘social feed’.

Kada imágen ta mustra un otro pida orguyo di nos isla: e palma sabal den lus kaluroso, e laman blou bèrdè di Lac i e palunan di mangel yen di bida. Imágennan ku ta laga bo sinti kon spesial Boneiru ta i dikon huntu nos ta kuida nos isla bon.

E héroenan di nos isla

Orguyo ta biba den hende tambe. Na Boneiru tin habitante i boluntario ku no ta warda te ora otro hende hasi algu. Nan ta piki shushi, nan ta planta palu, nan ta yuda rekuperá palu di mangel, nan ta kuida koral òf nan ta dediká nan tempu na hóbennan i na naturalesa. Sin aplouso. Ku kurason pa nan isla.

Pa e motibu akí nos ta konta nan storia den e seri di potrèt Héroenan di nos isla, ku a keda publiká riba Bonaire.nu i den Bonaire Reporter. E seri ta mustra loke ser orguyoso di Boneiru ta nifiká den práktika: kuido, dedikashon i amor pa e lugá kaminda nos ta biba. For di Reef Renewal te Mangrove Maniacs, for di Clean Coast Bonaire te Tera Barra i STINAPA Junior Rangers. 

Huntu e Héroenan di nos isla akí ta mustra ku kambio ta kuminsá chikitu. Serka hende ku simplemente ta hasi loke ta sinti bon.

Lesa e storianan di e Héroenan di nos isla den e menú i deskubrí kon orguyo ta lusi den akshon.