Peter – Terra Barra

Pa Peter Montanus, kuido di naturalesa ta algu opvio. Durante henter su bida laboral kaba esaki ta kana huntu kuné. Awor ku el a baha ku penshun, e ta kontinuá ku esaki komo boluntario na Tera Barra. No sintá tras di un lèsenar, pero pafó na aire liber. Ku tur dos su mannan den tera.

Plantamentu di palu ta mas ku solamente un akto práktiko p’e. E ta un manera pa wak padilanti. I pa duna Boneiru algu bèk. Pa Peter protekshon di naturalesa ta inseparablemente konektá ku bida na nos isla. Naturalesa ta kontribuí na nos bienestar. E ta e motibu pakiko hende gusta bin akinan. I e ta forma base di nos ekonomia. Na mes momentu e ta mira kon e naturalesa akí kada biaha ta mas bou di preshon. E noshon akí ta hasi ku sinta ketu no ta un opshon.

Riba promé bista Boneiru parse un isla bèrdè. Pero esun ku wak mas mihó, ta mira ku no tin hopi variedat den vegetashon mas. Pa medio di intervenshon humano durante hopi siglo, partinan grandi di e paisahe ta konsistí di solamente algun tipo di palu. Esaki ta hasi naturalesa vulnerabel. Pa e motibu akí Tera Barra ta traha riba mas variashon. E organisashon ta kultivá desenas di tipo di palu diferente pa enrikesé naturalesa i e hòfinan na nos isla. Di e manera akí e paisahe ta bira mas fuerte. I naturalesa ta haña espasio atrobe pa rekuperá su mes.

Pa Peter e trabou akí ta sinti komo un kontinuashon lógiko. Semper el a komprometé su mes pa medio ambiente i naturalesa. Solamente awor akí e ta hasié pafó. Mas trankil. Ku resultado visibel. Planta. Krese. Duna bèk.

E hendenan rònt di dje ta reakshoná positivamente i ta komprendé su motivashon. Kuida naturalesa no ta un akshon temporal. E ta algu ku bo ta keda hasi. Despues ku bo baha ku penshun tambe. Nos ta biba di naturalesa.

Bo mes ke duna algu bèk na Boneiru su naturalesa?

Peter ta laga nos mira ku kuido pa Boneiru ta kuminsá ku plantamentu, kresementu i pasenshi. Ku palu yòn, rais fuerte i mas variashon den e paisahe. Bo ke sa mas tokante e trabou di Tera Barra òf bo mes ke kontribuí na un Boneiru mas bèrdè? Bai riba wèpsait di Tera Barra òf bai direktamente na nan página di boluntario.