Agrikultura sostenibel na Boneiru

Suela fuerte, kuminda saludabel pa awor i despues

Huntu nos ta hasi Boneiru mas resiliente. Un kunuku, un grupo di bestia i un ref di koral pareu. Produkshon di kuminda na Boneiru ta bai mas leu ku solamente kosechá. E ta un sistema pa restourá paisahe, protehá laman i engrandesé nos resiliensia. Departamento di Agrikultura, Krio di Bestia i Piskamentu (LVV) ta yuda kunukeronan, kriadónan di bestia i piskadónan pa traha ku naturalesa: riba eskala chikitu, na un manera sostenibel ku ta kuadra ku nos isla.

Esaki ta rekerí bon guia, solushonnan inteligente i kompartishon di konosementu. Pa e motibu akí LVV ta krese bira é sitio di edukashon pa produktornan di kuminda sostenibel ku vários kapasitashon, proyekto di demostrashon i sosten pa esun ku ke kuminsá òf hasi un kambio.

Tera ku ta biba atrobe

Hopi kunuku ta sofoká. Debí na eroshon, bestia ku ta kome tur kos i awa di yobida ku ta laba bai. Pero rekuperashon ta den pleno marcha. Kunukeronan ta planta palu, nan ta fangu awa di yobida i nan ta kambia nan kultivo pa mehorá suela.

Esaki ta sòru pa mata mas fuerte, ménos strès debí na sekura i mas bida: insektonan, paranan i vegetashon di mondi ta bolbe bèk.

Kuminda kultivá lokalmente ta hasi nos ménos dependiente di importashon. Esaki ta importante na momentu di tormenta òf ora tin problema di suministro. I esun ku ta traha ku naturalesa, na mes momentu ta edifiká tambe siguridat di kuminda i resiliensia ekológiko.

No mas kabritu, karné i buriku ku ta kana lòs

Kabritu, karné i buriku ku ta kana lòs ta agotá suela i ta destruí mata yòn ku a kaba di sali. Pa e motibu akí kriadónan di bestia ta kambia pa trankera natural, manera yatu i pal’i sia. Kada biaha nan ta sera un otro pida tereno kaminda nan bestianan por kome i nan ta tira mihó bista riba e bestianan.

Pero solamente téknika no ta sufisiente. Hopi kriadó di bestia tin medionan limitá. Pa e motibu akí tin mester di sosten: finansiamentu, material, konosementu.

Krio di bestia kaminda mas tantu posibel ta inkluí naturalesa i biodiversidat no solamente mester restourá suela, pero e mester sòru tambe pa un entrada hustu. Di e manera ei e kriadonan di bestia por sigui eksistí, pero dentro di e límitenan di nos isla.

Mas piská debí na ménos preshon

Laman tin mester di trankilidat. Pa e motibu akí e piskadónan i LVV ta traha plan huntu: kaminda sí tin mag i kaminda no tin mag di piska, ki ora tin pousa i ku kua téknikanan.

E palabrashonnan ei ta forma parti di e maneho marina mas amplio pa protekshon di koral, palu di mangel i populashon di piská.

Nan ta wak tambe kua alternativa tin, manera kultivo di yerba di laman òf bestia di laman (marisko). I hóbennan ta haña oportunidat pa siña i bira piskadó nobo.

Piskamentu ta keda ekonómikamente importante. P’esei no ta trata di kue ménos piská, pero di traha den un forma mas inteligente: ku konservashon di nos espesienan i un mihó entrada.

Kiko abo por hasi?

Bo ke sa kon bo por kontribuí na un Boneiru resiliente? Eksplorá e plannan, deskubrí e proyektonan òf lesa den notisia kon kunukeronan, kriadónan di bestia i piskadónan ta edifikando kuminda lokal i rekuperashon.