Brian – Clean Coast Bonaire

Promé biaha ku Brian Coffey a bini Boneiru tabata komo turista. E tabata kier a deskubrí nos famoso bida bou di laman. Hopi lihé el a ripará ku no solamente nos laman, pero tambe loke tin riba tera i nos hendenan ta hasi nos isla spesial. E enbolbimentu di nos komunidat a hasi impreshon. Tabata evidente ku akinan kuido di naturalesa ta algu ku bo ta hasi huntu.

Komo boluntario na Clean Coast Bonaire, Brian ta yuda ku limpiesa di bich. E akshonnan di limpiesa akí tin un efekto visibel direkto, pero nan ta sirbi un meta mas grandi tambe. E shushi ku nan kolektá ta keda registrá i usá pa investigashon sientífiko. Di e manera akí ta surgi mihó konosementu for di unda e shushi ta bini i ki influensia e tin riba nos kosta. Pa Brian e balor ta netamente den e kombinashon ei. Un bich limpi awe i konosementu pa mañan. Pa medio di kolektá dato strukturalmente, ta surgi un imágen ku ta yuda pa aktua ku mas enfoke i pa engrandesé konsientisashon.

Kuida naturalesa no ta limitá su mes na un solo sitio òf un solo aktividat. Banda di limpiesa riba bich, Brian ta komprometé su mes ku otro inisiativanan tambe na nos isla. E ta yuda ku reforestashon na Klein Bonaire, e ta sostené restorashon di palu di mangel na Lac Bay i e ta kontribuí na konstrukshon di kaminda pa kana. Trabou ku ta rekerí tempu i di kua tin ora ta te despues di tempu e resultado ta bira visibel.

Brian a bishitá hopi isla den área karibense, pero Boneiru ta distinguí su mes pa medio di e kompromiso fuerte ku protekshon di naturalesa i e ròl aktivo di boluntarionan. Sin e kompromiso konhunto akí, hopi di e inisiativanan lo no tabata posibel. Su mensahe ta simpel i e ta kontené un invitashon. Sea ku bo ta biba akí, bo ta hende djaki òf bo ta di bishita akinan. Tur hende por kontribuí. Maske ta ku djis un saku di shushi òf pa medio di para ketu mas tantu biaha na loke tin di protehá. Nos ta biba di naturalesa.

Bo mes ke hasi algu pa un kosta limpi?

Brian ta mustra nos ku kuida Boneiru ta kuminsá ku partisipá na esaki. Ku un saku di shushi den bo man, atenshon pa loke bo ta topa kuné i e boluntat pa laga e bich mas limpi atras ku bo a hañ’é. Bo ke sa mas tokante Clean Coast Bonaire, òf bo mes ke kontribuí na un kosta mas limpi? Bai riba wèpsait di Clean Coast Bonaire òf bai direktamente na nan página di boluntario.