Artie – Mangrove Maniacs
Traha ku dos man pa logra un kosta fuerte
Pa Artie de Vries, ora ku bo ta ku penshun esei no ta un motibu pa sinta ketu. Anda pafó na aire liber ta ten’é vital. Su lema ta simpel. If you don’t use it, you lose it – Si bo no hasi uso di dje, bo ta pèrd’é. I esaki bo ta mira bèk den tur loke e ta hasi pa Boneiru.
Artie ta boluntario aktivo na Mangrove Maniacs, e grupo ku ta traha riba restorashon di e palunan di mangel. E palunan di mangel akí ta protehá Boneiru kontra eroshon i tormenta. Artie ta sòru pa propagules, e simianan yòn di palu di mangel. E ta kolektá nan, kuida nan i prepará nan pa por planta nan den áreanan vulnerabel di kosta. Riba djadumingu e ta sostené e proyekto di reforestashon na Klein Bonaire, kaminda e ta habri kaminda i duna palu yòn espasio pa krese.
Banda di esaki via MiVaBo e ta komprometé su mes pa hende ku limitashon. E ta yuda hasi nan kas mas aksesibel pa medio di traha kaminda pa kana i hasi adaptashon chikitu. Tambe e ta limpia bich. Pa Artie esaki ta un forma di meditashon. E olanan. E trankilidat. I e momentu ku e bich ta limpi atrobe.
Artie ta mustra nos ku rekuperashon di naturalesa ta kuminsá ku aktonan chikitu. Ku bo mannan. Ku plaser den moveshon. I ku amor pa nos isla. Nos ta biba di naturalesa.
Bo mes ke hasi algu pa un kosta fuerte?
Artie ta mustra ku kuida Boneiru ta kuminsá ku moveshon. Ku kolektá propagules, duna palu yòn espasio i traha paso pa paso riba restorashon. Bo ke sa mas tokante e trabou di Mangrove Maniacs òf bo mes ke yuda pa kultivá palu di mangel fuerte? Lesa mas tokante Mangrove Maniacs riba e wèpsait akí òf bai mesora na nan página di boluntario.
