Huntu nos ta hasi e diferensia

Dutch Caribbean Nature Alliance (DCNA) ta komprometé su mes ku protekshon di naturalesa na e seis islanan di e parti karibense di Reino. For di kompartí konosementu te rekoudá fondo: e organisashon akí ta trese manehadónan di naturalesa huntu, e ta fortifiká nan determinashon i e ta hasi e storia di naturalesa visibel.

BonBèrdè no ta kualke manehadó di naturalesa. For di suela te na e punta mas haltu di un palu: e tim akí ta traha tur dia pa logra un ekosistema mas salú na Boneiru. Nan ta kombiná trabou den vèlt ku investigashon, i eksperensia práktiko ku vishon ekológiko. Tur loke ku ta krese, ku ta kore òf ku mester bin bèk den ekilibrio, ta haña nan atenshon kompleto.

Fundashon Internos ta traha riba restorashon di naturalesa na Boneiru ku konosementu, diferente punto di midimentu i ku hende. Den esaki nan ta enbolbí universidatnan i habitantenan di nos isla, pasobra ta huntu só restorashon di naturalesa ta logra.

For di maneho di awa te iluminashon di pista di aterizahe: Ministerio di Infrastruktura i Maneho di Awa (I&W) ta koperá pa hasi Boneiru habitabel i seif. Ku proyektonan inovativo i supervishon estrikto, I&W ta yuda trese naturalesa i infrastruktura den equilibrio.

Ministerio di Agrikultura, Piskamentu, Siguridat di Kuminda i Naturalesa (LVVN) ta trahando pa logra un Boneiru mas resiliente. Ku sosten di kunukeronan, piskadónan i protektornan di naturalesa, e partner akí ta edifikando un isla ku por alimentá i protehá su mes.

Mangrove Maniacs ta hasi nan máksimo esfuerso pa nos naturalesa. Tur siman nan ta den awa pa habri kanal, planta palu yòn i restorá palu di mangel. Nan ta kombiná konosementu ku akshon, i nan ta enbolbí henter komunidat ku esaki: for di mucha di skol te hende ku ta snòrkel. Pasobra solamente si nos komprendé kiko palu di mangel ta hasi, nos ta bai protehá nan tambe.

Reef Renewal Foundation Bonaire ta komprometé su mes pa restorashon di ref di koral. Ku konosementu, timnan di buseo i míles di koral nan ta traha riba restorashon bou di laman. Loke a kuminsá komo un proyekto chikitu, a krese bira un programa fuerte ku impakto mundial.

Awa bibu. Ref ku ta hala rosea. I tras di kortina? Rijkswaterstaat. Nan ta midi loke bo no por mira djis riba bista so, esta: kon salú laman ta. Nan ta yuda ora algu bai robes, ora tin zeta riba laman òf ora tin daño na kosta. Un organisashon hulandes ku un ròl silensioso pero sólido na Boneiru.

STINAPA ta manehá e dos parkenan nashonal di Boneiru: riba tera i bou di laman. For di ref di koral te kunuku, for di flamingo te sambuyadó, e organisashon akí ta protehá e naturalesa ku nos isla ta biba di dje. I nan no ta hasi esaki solamente ku regla, pero tambe ku kuido, konosementu i ku amor pa e área.

WEB ta sòru pa awa i koriente na Boneiru. Nan ta invertí den energia bèrdè, nan ta purifiká awa shushi i nan mes ta traha awa di bebe for di awa di laman. Tras di kortina nan ta yuda edifiká un isla sostenibel ku teknologia inteligente i hendenan enbolbí.

Turtuga, palu di mangel, koral i kosta. WWF Hulanda Karibense ta protehá loke ta hasi Boneiru úniko. Nan ta fortifiká naturalesa na kosta, nan ta traha huntu ku organisashonnan lokal i nan ta enfoká riba resiliensia di klima. For di nan ret mundial nan ta trese konosementu, rekurso i konekshon. Pero e trabou real nan ta hasi akinan. Ku bonerianonan, pa naturalesa di nan isla.