Ministerio di Agrikultura, Piskamentu, Siguridat di Kuminda i Naturalesa

Sin un naturalesa salú, no tin futuro. I sin kuminda no tin e dia djawe. Ministerio di Agrikultura, Piskamentu, Siguridat di Kuminda i Naturalesa (LVVN) ta vigilá e ekilibrio akí na Boneiru i na Hulanda Oropeo.

Sosten na agrikultura, krio di bestia i piskamentu

Na Boneiru e ministerio ta yuda fortifiká sektor agríkola. No ku plan di papel, pero ku konosementu, rekurso i akshon konkreto. Pensa riba mehorashon di rasa pa kabritu i karné, òf sosten pa kunukeronan ku ke sostenibilisá. Den esaki e sentro di konosementu di departamento di Agrikultura, Krio di Bestia i Piskamentu di Boneiru (LVV) ta hunga un ròl sentral i ku yudansa di e ministerio e sentro ta desaroyá i bira é sitio kaminda ta kompartí i apliká konosementu di agrikultura.

Un futuro sostenibel riba laman

Riba laman tambe e ministerio ta mustra su kara. Huntu ku entidat públiko Boneiru nan a traha riba un maneho di piskamentu ku ta trese naturalesa i siguridat di kuminda huntu. Di e manera akí laman ta keda produktivo sin ku nan ta lag’é kompletamente bashí. Bon pa nos piskadónan i bon pa nos refnan.

Naturalesa komo punto di salida

Konservashon di naturalesa ta por lo ménos mes importante ku siguridat di kuminda. Pa e motibu akí e ministerio ta sostené proyektonan ku ta protehá ekosistemanan vulnerabel, ku ta fortifiká biodiversidat i ku ta manehá rekursonan natural na un manera sostenibel. E aserkamentu akí ta sòru pa un naturalesa resiliente i un ambiente habitabel.

Ekilibrio komo núkleo di maneho

LVVN kontinuamente ta buskando ekilibrio: entre kosecha i konservashon, entre kresementu ekonómiko i protekshon di nos isla. Di e manera akí e partner akí ta kontribuí na un Boneiru resiliente. Pa awor i pa e generashonnan di futuro.