Dentro di poko kunukeronan na Boneiru ta haña un hèrmènt útil aserka. E Phito App ku nan ta desaroyá spesialmente pa agrikultura i krio di bestia riba eskala chikitu, ta yuda kunukeronan ku konseho i e ta trese nan den kontakto ku otro. E app ta den desaroyo ainda, pero ya kaba kunukeronan na nos isla a tèst un vershon di prueba. Awor akí nan ideanan i eksperensianan ta keda prosesá den un vershon mehorá, ku nan ta lansa promé ku verano.
Desaroyá huntu ku kunukeronan
E app ta forma parti di e proyekto internashonal ‘Phito’, den kua Boneiru ta traha huntu ku Aruba, Spaña i Portugal. Na Boneiru departamento di Agrikultura, Krio di Bestia i Piskamentu (LVV) ta e partner lokal. Ya for di komienso ta enbolbí kunukeronan aktivamente ku desaroyo di e app. Na luna di òktober di aña pasá LVV a organisá un enkuentro kaminda kunukeronan por a kompartí nan deseonan i ideanan.
Un deseo hopi skuchá? Un notifikashon riba bo telefòn, asina ku tin áwaseru na kaminda. Di e manera akí kunukeronan por plania i reakshoná mas mihó riba wer.
Funshonnan inteligente, pero simpel den uso
E Phito App ta haña dos funshon importante:
- Konseho na midí: Kunukeronan ta haña informashon riba dje tokante agrikultura i krio di bestia sostenibel ku ta kuadra ku e sirkunstansianan na Boneiru.
- Funshon di ret: E app ta hasi ku ta fásil pa drenta den kontakto ku kolega kunukeronan, pero tambe ku klientenan manera restorant i supermarket.
‘Si nos por haña otro mas mihó, nos por logra mas,’ asina un di e partisipantenan a bisa durante e enkuentro di prueba. ‘Tin ora bo tin di mas, tin ora bo falta trahadó. Si bo por kompartí esaki, bo ta traha na un manera mas inteligente.’
Fitbèk for di práktika
Na luna di febrüari LVV a invitá e kunukeronan pa tèst e promé vershon di e app. Durante kòmbersashonnan den grupo chikitu i kòmbersashonnan personal, nan a instalá e app riba nan telefòn i nan a kompartí nan eksperensianan. Awor akí a manda e fitbèk akí pa e tim di desaroyo. Den mayoria kaso e reakshonnan tabata positivo, pero tambe krítiko: algun parti mester ta mas klarito i mas fásil pa usa. Awor ta trahando riba esaki.
