Riba djamars 8 di yüli kunukeronan, supermarketnan i empresarionan di hóreka a bini huntu riba invitashon di departamento di Agrikultura, Krio di Bestia i Piskamentu (LVV). Durante un seshon di informashon nan a haña un bista chikitu den e Phito-App nobo, un hèrmènt digital den desaroyo ku tin ku konektá kunukeronan mas mihó ku otro i ku e merkado lokal.
E Phito-App ta forma parti di e proyekto oropeo di Phito, ku Cambisol i Wageningen Univesity a krea. E proyekto ta tuma lugá riba vários isla i den paisnan manera Spaña, Italia i Portugal. Meta di esaki ta pa fortifiká produkshon lokal di kuminda pa medio di hasi kolaborashon i interkambio di konsementu mas fásil.
Marshe, mensahe i sabiduria di kunukero
Aktualmente e departamento di Agrikultura, Krio di Bestia i Piskamentu (LVV) ta tèst e app akí na Boneiru ku un grupo di kunukero. E app ta kontené entre otro un marshe digital, un funshon di mensahe i un biblioteka ku tep agríkola. Di e manera akí kunukeronan por haña otro mas lihé, i ta bira mas fásil pa hasi entrega direktamente na supermarketnan i restorantnan.
Na aña 2024 nan a investigá kiko kunukeronan tin mester pa por produsí i bende nan produktonan mas mihó. A base di esaki na kuminsamentu di e aña akí nan a kuminsá ku e fase di prueba di e app. E partisipantenan presente por a duna nan fitbèk riba e promé funshonnan, di manera ku e app ta konektá mas mihó ainda ku práktika di nos isla.
Di fase di prueba pa futuro
E lansamentu ofisial di e Phito-App ta planiá pa aña 2026. Te na e momentu ei nan ta sigui traha riba un vershon ku ta fásil den uso i sinkronisá riba deseonan di e kunukero boneriano. E promé reakshonnan ta alentador.
‘Un app ku ta yuda mi bende direktamente i ku ta duna konseho, esei ta algu ku mi por hasi bon uso di dje,’ segun un di e kunukeronan partisipante.
