Un grupo di mas ku 25 empresario boneriano i representantenan di Entidat Públiko Boneiru ta sali awe pa e feria agroindustrial di mas grandi den área karibense: Agroalimentaria 2025 na Santo Domingo. Einan durante kuater dia, for di 28 te ku 31 di mei, oportunidatnan komersial ta sentral.
E partisipantenan ta bini for di diferente sektor, entre otro agrikultura, krio di bestia, importashon/eksportashon i konstrukshon. Nan ta haña sosten di empleadonan di departamento di Asuntunan Ekonómiko, departamento di Agrikultura, Krio di Bestia i Piskamentu (LVV) i miembronan di Konseho Insular. Huntu nan ta komprometé nan mes pa eksplorá merkadonan nobo i establesé kontaktonan nobo ku produktornan, suministradónan i invershonistanan di den region.
Banda di e feria e partisipantenan ta bishitá tambe mayoristanan den material di konstrukshon i fábrikanan kaminda nan ta prosesá kòkou i kuminda. Tambe tin un enkuentro ku embahada hulandes riba programa, i tin espasio pa kòmbersashonnan individual ku potensial partnernan komersial.
Traha huntu pa logra un ekonomia mas fuerte
Diputado Clark Abraham ta suprayá importansia di e mishon akí: ‘Literalmente i figurativamente nos ta duna empresarionan espasio pa krese. Pa medio di trese nan den kontakto ku merkadonan nobo i ideanan inovativo, nos ta edifiká un ekonomia mas fuerte i mas resiliente pa Boneiru.’
Entidat Públiko Boneiru ta sostené e mishon akí aktivamente i ta ofresé un kontribushon finansiero na e empresarionan partisipante.
