For di 19 te ku 23 di mei Boneiru ta e kurason palpitante di Karibe Hulandes. Representantenan for di tur seis isla i Hulanda Oropeo ta bini huntu na nos isla pa papia tokante futuro di nos agrikultura, krio di bestia i piskamentu. Den esaki tur kos ta drai rònt di un solo meta: mas produkshon lokal i ménos dependensia di importashon.
For di aña pasá, e islanan ta traha huntu dentro di e ret di DCALFA. Durante e di dos konferensia akí di DCALFA na Boneiru, nan lo sigui edifiká un kolaborashon sólido. Esaki ta tuma lugá ku trahadónan di maneho, pero tambe ku piskadónan, kunukeronan i empresarionan hóben di e islanan.
Boneiru ta un anfitrion orguyoso
‘E konferensia akí ta importante. No solamente pa e plannan di maneho, pero prinsipalmente pa e kolaborashon entre hendenan di e islanan,’ segun diputado Anjelica Cicilia. ‘Komo isla nos por fortifiká otro. Esei ta kuminsá akinan.’
Kiko ta bai pasa e siman akí?
Durante e konferensia nan ta lansa e wèpsait ofisial di DCALFA, di manera ku tur hende por keda na altura di e trabou ku ta keda desplegá. Mas aleu tin vários tayer tokante piskamentu sostenibel, ròl di sektor privá i embolbimentu di hóbennan ku produkshon di kuminda. Tin un diskushon di pènel tambe ku e diputadonan i un minister, kaminda huntu ta wak den direkshon di un rumbo konhunto pa siguridat di kuminda na Karibe Hulandes.
Enfoke riba partisipantenan hóben
Remarkabel durante e edishon akí: partisipashon di hóbennan. For di kada isla tin empresarionan hóben for di agrikultura, krio di bestia i piskamentu ta partisipá. Danki na sosten di ministerionan hulandes nan por partisipá aktivamente i laga tende nan bos.
En total tin 55 partisipante. Entidat Públiko Boneiru i Servisio di Reino pa Hulanda Empresarial (Rijksdienst voor Ondernemend Nederland – RVO) a organisá e konferensia.
Bo ke sigui tur kos na kas? Esei ta posibel.
Por sigui e konferensia i e diskushon di pènel ‘live’ i wak nan bèk via e ‘livestream’ di Entidat Públiko Boneiru.
