Kon futuro di agrikultura na Boneiru ta lusi? Kiko nos kunukeronan tin mester pa por traha mas sostenibel i produsí mas kuminda lokal? E preguntanan akí tabata sentral durante bishita di e Komishon di Relashonnan den Reino di Tweede Kamer na departamento di Agrikultura, Krio di Bestia i Piskamentu (LVV) riba djabièrnè 9 di mei.
E delegashon tabata bou di guia di presidente di e komishon Olger van Dijk (NSC) i tabata konsistí mas aleu di Raoul White (GroenLinks-PvdA), Aukje de Vries (VVD), Faith Bruyning (NSC), Mpanzu Bamenga (D66), Don Ceder (ChristenUnie) i grefir di e komishon Eva Meijers.
Durante un rekorido amplio e miembronan di Tweede Kamer a sera konosí ku e práktika lokal di agrikultura i ku frankesa nan a papia ku e kunukeronan di entre otro B-Fresh, Daily Fresh, Queen Clarita, Nature Cooking, Island Tings i Bon Tera. E kunukeronan a kompartí nan eksperensianan, nan éksitonan i nan preokupashonnan. Nan a papia entre otro tokante e gastunan haltu pa awa i kuminda di bestia, importansia di formashon i sosten, i e nesesidat pa mihó kolaborashon entre gobièrnu i e kunukeronan.
‘Ta importante pa e miembronan di Tweede Kamer mira ku nan propio wowo kiko ta pasando akí nan,’ segun un di e kunukeronan presente. ‘Nos tin e konosementu i e motivashon, pero nos no por hasi esaki nos so.’
Tantu e miembronan di Tweede Kamer komo nos sektor lokal a eksperensiá e bishita komo di hopi balor. E komishon a bisa ku nan ta bai Den Haag ku e konosementu ku nan a haña, pa wak si Reino por kontribuí den un forma mas struktural na produkshon sostenibel di kuminda na Boneiru.
