Durante su bishita di trabou na Den Haag, na nòmber di Entidat Públiko Boneiru diputado Anjelica Cicilia a papia ku diferente mandatario tokante dos tópiko importante: siguridat di kuminda i kontinuashon di e Plan di Maneho pa Naturalesa i Medio Ambiente (NMBP). No opstante e insiguridat polítiko na Hulanda despues di kaida di e gabinete, segun Cicilia ainda tin hopi disponibilidat serka Reino pa sigui traha huntu riba esakinan.
Un di e metanan mas importante den e Plan di Maneho pa Naturalesa i Medio Ambiente ta mehorashon di maneho di shushi na Boneiru. ‘Nos ke bai den direkshon di un futuro sin sitio habrí pa depositá shushi,’ segun Cicilia. ‘Esaki ta nifiká mihó separashon, prosesamentu mas inteligente i finalmente: seramentu di e lèntfel na Lagun na aña 2030.’
Banda di esaki tabatin hopi atenshon pa fortifikashon di nos produkshon lokal di kuminda. Pa esaki ministerio di Agrikultura, Piskamentu, Siguridat di Kuminda i Naturalesa (LVVN) ta trahando riba un fondo rotativo. Via e fondo akí, empresarionan na e islanan mester por hasi fiansa kontra un interes abou, di manera ku nan por invertí den agrikultura sostenibel, produkshon lokal i prosesamentu di kuminda. E plan ta pa hasi 24 mion euro liber pa e fondo akí pa e seis islanan karibense. Segun Cicilia e sèn mester ta solamente un komienso: ‘Banda di finansiamentu nos tin mester di konosementu, hende i bon kolaborashon tambe. Loke ta funshoná na e islanan, ta otro for di na Hulanda Oropeo. Nos tin ku hasi eskohonan inteligente pues. Bira ménos dependiente di importashon, ta kuminsá ku fortifikashon di nos propio kunukeronan i produktornan.’
Na Den Haag Cicilia a papia ku entre otro sekretario di estado Jean Rummenie (LVVN) i e direktor general di Naturalesa i Piskamentu, señor Mark Roskam Abbing. Tambe e ministerio di Asuntunan Interno i Relashonnan den Reino (BZK) tabata enbolbí ku e kòmbersashonnan.
Anteriormente e aña akí ya kaba Kolegio Ehekutivo a presentá un petishon pa ayudo bon kla serka Reino: solamente ku enbolbimentu di vários ministerio, solushonnan sostenibel pa shushi i siguridat di kuminda por bira realidat. ‘E kòmbersashonnan ta konfirmá ku Reino ta tuma e responsabilidat ei na serio,’ segun Cicilia. ‘Boneiru ta enfrentando desafionan grandi. Pero si nos sigui kolaborá ku otro, paso pa paso nos por realisá mehorashonnan real.’
