Water Circles

Siklonan inteligente ta tene awa leu for di nos refnan.

Bo ta sinti e diferensia? Un hòfi bèrdè kaminda promé tur kos tabata seku. No tin holó stinki mas den bisindario. I bou di awa: koral ku porfin por hala rosea atrobe.

Na Boneiru hopi biaha awa shushi ta disparsé direktamente den suela. Òf mas pió ainda: e ta kore bai laman, kaminda pokopoko e ta venená nos refnan. Prinsipalmente na sitionan kaminda no tin kloaka e daño ta grandi. Pa e motibu akí Entidat Públiko Boneiru, STINAPA, WEB, Water Alliance i WWF-NL ta uni forsa. Ku un solo mishon: purifiká awa lokalmente i reusá esaki. Na sinku sitio ‘Water Circles’ ta tèst instalashon chikitu di purifikashon, adaptá na situashon di e sitio ei. Inteligente, sostenibel i eskalabel. Pasobra dikon laga awa shushi kore bai, si bo por reus’é tambe?

Dikon esaki ta importante

Awa shushi ta un invasor silensioso. E ta hasi nos koralnan malu, e ta alimentá alga i e ta saka tur koló for di laman. Na mes momentu nos isla ta bira seku i kada biaha awa limpi ta bira mas skars. ‘Water Circles’ ta atendé ku tur dos problema pareu: nan ta evitá ku awa shushi ta resultá den laman i nan ta enfoká riba reuso pa irigashon, pa limpiesa òf pa hasi nos kunukunan mas bèrdè. Esaki no ta algu pa futuro. E ta sosodiendo na é momentu akí.

Asin’aki e ta funshoná na Boneiru

Na sinku sitio nan ta instalá un sistema desentral ku ta purifiká awa shushi na e sitio ei mes. Minusiosamente nan ta monitoreá e téknikanan: kon bon nan ta funshoná, kiko e gastunan ta, i habitantenan i empresarionan por traha ku nan? Enbolbimenti lokal ta sentral. Nan no ta solamente informá nos hendenan, pero ta bin tambe un programa edukativo kaminda nan ta ofresé studiantenan di MBO formashon den maneho di awa. “E idea ta simpel,” segun Meike Breedveld, Lider di proyekto awa NMBP. “Awa ku bo ta reusá, no ta resultá den laman mas. Ku esaki bo ta protehá nos refnan i bo ta hasi nos isla mas resiliente.'

Kiko ta e resultado

‘Water Circles’ ta mas ku un prueba. E ta un paso den direkshon di e promesa pa na aña 2030 no dùmp awa shushi mas den Parke Nashonal Marino Boneiru. E proyekto ta laga nos mira ku purifikashon lokal ta funshoná, e ta oumentá konosementu i e ta habri porta pa ampliashon. Kiko ta e ganashi? Laman mas limpi, mas konsientisashon, i un isla ku ta anda mas ekonómikamente ku loke ta skars.