Un proyekto importante a ranka sali na lèntfel Lagun e siman akí. Afvalzorg, un organisashon hulandes ku hopi eksperensia den maneho di shushi, a kuminsá atendé ku e kandelanan bou di tera i ku mehorashon di e sistema di traha na e lèntfel.
Afvalzorg a investigá e tereno huntu ku Selibon. Nan a haña 15 sitio kaminda tin kandela ta kimando bou di tera. E kandelanan akí no ta grandi, pero nan por ta dañino pa salú i medio ambiente sí. Pensa riba huma, kalor òf dam tóksiko. Pa e motibu akí ta importante pa paga nan na un manera seif.
Awor akí Afvalzorg ta trahando un plan klarito. Den e plan tin pará kon nan ta atendé ku e kandelanan i den ki forma maneho di shushi na Lagun por tuma lugá mas mihó. Na momentu di formulashon di e plan akí, Afvalzorg huntu ku Selibon ta pensa tambe riba siguridat di e empleadonan, ròl di kuerpo di bombero i preokupashon di e hendenan ku ta biba den bisindario.
Pa término mas largu tambe ta bin yudansa. Un gerente eksperensiá di Afvalzorg ta sostené e tim di Selibon i ta duna konseho tokante maneho di shushi ku ta seif i mas mihó. Di e manera akí nos por separá fluhonan di shushi den un forma mas inteligente, redusí riesgo i traha mas efisientemente pa logra un ambiente di biba mas salú.
E kolaborashon akí ku Afvalzorg ta forma parti di un aserkamentu mas amplio. No solamente lèntfel Lagun nan ta atendé kuné, pero paso pa paso ta bai mehorá Morotin tambe. Esaki ta tuma lugá den konsulta ku tur partido enbolbí i e abitantenan. Ku esaki Kolegio Ehekutivo ke mustra ku nan ta dediká hopi esfuerso, tempu i atenshon na maneho di shushi i na salubridat. ‘Nos ta asumí nos responsabilidat. Afvalzorg ta yuda nos hasi esaki na un manera bon i seif.’
