Boneiru ta poniendo pasonan grandi pa hasi nos isla mas limpi. Kolegio Ehekutivo ta trahando riba un aserkamentu nobo pa shushi, di manera ku por prosesá shushi mas mihó i reusá mas tantu material. Esaki ta bon pa salú di hende i naturalesa, i pa futuro di nos isla.
E kantidat di shushi na Boneiru ta sigui krese. Esaki ta konsekuensia di entre otro mas habitante, mas bishitante i importashon di mas produkto. Te ainda hopi di e shushi akí ta resultá na e sitio di depositá shushi. Tambe kada biaha tin mas tantu shushi riba kaya i den naturalesa. Mester bin kambio den esaki.
Pa e motibu akí Kolegio Ehekutivo a duna enkargo pa un vishon nobo di shushi. Den esaki tin kon Boneiru por kolektá shushi na un manera mas inteligente, kon pa prosesá shushi mas mihó i kon pa resiklá mas shushi. Royal Haskoning DHV ta formulá e vishon akí i na kuminsamentu di aña 2026 e ta kla.
Un sitio nobo pa prosesamentu di shushi
Banda di e vishon di shushi Kolegio Ehekutivo ta laga investigá si tin un mihó sitio pa prosesamentu di shushi. Un di e opshonnan ta un tereno na kosta pabou, pegá ku BOPEC. E sitio ei ta bon alkansabel i ta situá pafó di nos barionan residensial, loke ta sòru pa ménos molèster i un mihó logístika.
Kiko esaki ta nifiká pa Boneiru?
Ku un aserkamentu inteligente di shushi, Boneiru ta traha pa logra:
- Ménos shushi na e sitio pa depositá shushi
- Mas reuso di material
- Ménos polushon i un ambiente di biba mas saludabel
- Oportunidatnan nobo, manera generá energia for di shushi
Huntu pa un isla mas limpi i mas sostenibel
E plannan akí ta un paso importante na kaminda pa un ekonomia sirkular, kaminda nos ta anda inteligentemente ku materia prima. Pero nos só no por mantené nos isla limpi. Den esaki nos tin mester di yudansa tambe di habitantenan, empresanan i organisashonnan. Huntu nos ta hasi Boneiru mas limpi i mas salú. Awor i den futuro.
