E promé Town Hall Meeting tokante e situashon na i rònt di e sitio di depositá shushi na Lagun a atraé hopi bishitante enbolbí. Hendenan di den bisindario a bini ku preguntanan krítiko, nan a kompartí nan preokupashonnan i nan a yuda pensa aktivamente tokante posibel solushonnan. Tabata un kòmbersashon habrí i sinsero entre habitantenan, gobernantenan i profeshonalnan.
E enkuentro a tuma lugá djabièrnè anochi 2 di mei. Nan a rekonosé evidentemente ku e situashon na Lagun ta serio. No solamente pa naturalesa, pero tambe pa salú di e hendenan den bisindario. Hopi habitante pa basta tempu kaba tin preokupashon tokante e huma, e holó stinki i e posibel riesgonan pa nan yunan. Kolegio Ehekutivo a tuma e señalnan akí na serio i a drenta den kòmbersashon tokante esakinan ku e hendenan presente.
Spesialistanan di e Programa di Maneho Sostenibel di Shushi (Programma Duurzaam Afvalbeheer – DAB) i GGD a duna splikashon tokante e situashon aktual. Nan a presentá e medidanan planiá pa mehorashon i e promé resultadonan di e investigashonnan di kalidat di aire i otro riesgonan. E partisipantenan a skucha ku hopi atenshon i nan a hasi vários pregunta skèrpi. Esaki a sòru pa kòmbersashonnan balioso, kaminda e habitantenan a kompartí nan propio ideanan tambe.
E anochi akí tabata e promé den un seri di enkuentro tokante maneho di shushi na Boneiru. E meta ta pa traha huntu ku nos komunidat pa logra un isla mas limpi, mas salú i mas seif. Kolegio Ehekutivo a enfatisá ku e situashon na Lagun tin nan atenshon kompleto. Nan ta trahando riba mehorashonnan konkreto, den kolaborashon ku Selibon, gobièrnu di Reino i Boneiru su mes hendenan.
