Restorashon di palu di mangel den Bahia di Lac

Habri kanal, planta palu yòn: asina Bahia di Lac ta haña bida atrobe

Bo ta mir’é bo dilanti? Te na bo rudia den lodo, un skòp den bo man, lus di solo ku ta belenkiá riba awa di un kanal nobo ku nan a koba. Kaminda promé tabatin solamente rais morto, awor palu di mangel yòn ta krese. E palunan di mangel den Bahia di Lac tabata sufri. E kanalnan tabata yená ku lodo, e awa salu no por a sigui kore bai. E raisnan tabata seka, hopi palu yòn tabata muri. Pero naturalesa ta haña un di dos chèns. Fundashon Internos i Mangrove Maniacs ta koba kanal nobo, nan ta habri konekshonnan bieu atrobe i nan ta planta míles di palu di mangel yòn. Ku man. Kada palu ta un paso padilanti.

“E áreanan kaminda palu di mangel korá a muri, nos ta mira rekuperá awor akí,” segun Sabine Engel di Mangrove Maniacs. “E piskánan ta bini bèk. Realmente nos ta mira efekto di loke nos ta hasi.”

Dikon e proyekto akí ta konta

E palunan di mangel den Bahia di Lac no ta djis un dekorashon. Nan ta bùfer, kamber di parto i wardadó di kosta, tur tres pareu. Nan ta protehá Boneiru kontra eroshon i tormenta, nan ta almasená CO₂ i nan ta brinda kuminda i refugio pa piská, para i kangreu. Pero si e awa no ta kore, e mondi ta sofoká. Pa e motibu akí e proyekto di restorashon ta asina importante: pa konservá loke lo bai pèrdí si no aktua.

Ku man den lodo

A base di e plan di restorashon di palu di mangel nan a indiká vários zona di restorashon. En total Mangrove Maniacs a habri mas ku 3,8 kilometer di kanal atrobe. Pa un gran parti nan ta hasi esaki ku man, huntu ku boluntarionan. Di e manera ei ya kaba nan a planta 3700 palu di mangel yòn. Pa medio di monitoreo i kòmbersashon ku gerentenan, gobièrnunan i ekspertonan, e proyekto ta krese pareu ku e sitio.

“Bo ta pará einan den lodo, ku un skòp i un palu,” asina un boluntario ta bisa ku un smail riba su kara. “Pero bo sa: akí un par di aña esaki ta un mondi bibu atrobe.”

Kiko ta e resultado

Danki na e echo ku a habri e kanalnan, nan ta haña bida bèk. E palunan di mangel ta haña espasio atrobe pa krese, e piskánan ta haña nan kamber di parto bèk i e paranan ta baha atrobe den e vegetashon bèrdè. E proyekto no ta sòru solamente pa bentaha pa naturalesa, pero tambe pa konosementu, enbolbimentu i orguyo. E ta yuda eksaktamente kaminda ta nesesario: ku restorashon di e áreanan di kosta ku ta protehá nos. I kisas mas importante ainda: e ta hasi e konekshon entre hende i palu di mangel bibu atrobe.