Instalashon pa deshasí di awa shushi di yate

Un yate ta mara den nos haf. Na bordo tin un tanki yen di awa di tualèt. Te resientemente hopi biaha simplemente nan tabata hasié bashí. Direktamente den laman, riba koral vulnerabel. Awor akí no mas. Na dos sitio, esta na Plaza Marina i Harbour Village, nan a pone instalashon spesial. Akinan doñonan di yate por deshasí di nan awa shushi via un sistema será. Konektá e slan riba dje, drai e boton, i e awa ta disparsé nèchi asina rumbo pa e planta di purifikashon di awa shushi. No tin holó, ni riesgo, ni polushon mas. E téknika ta simpel, e impakto ta grandi. E konstrukshon ta kla, a tèst e sistemanan i e ta den uso. Kada doño di yate ku na un manera responsabel ke deshasí di su awa shushi, por akudí akinan.

No tin lugá pa awa shushi riba ref

Boneiru ta popular serka yatenan di plaser. I esaki ta trese sierto riesgonan kuné. Pasobra si desénas di boto pa dia ta basha nan awa di tualèt den laman, e ora ei e awa ta kontaminá ku bakteria, nitrógeno i otro supstansianan ku ta dañino pa nos refnan i pa nos salú. Segun regla ya kaba esaki no tabata pèrmití. Tòg e tabata sosodé. Simplemente no tabatin fasilidat.

“Pa hopi aña kaba mi ta sambuyá na Plaza,” asina un instruktor lokal ta bisa. “E pensamentu ku nan tabata basha awa shushi stret riba nos refnan? Esei mi tabata haña hopi preokupante.”

Awor ta bin kambio den esaki. Danki na e proyekto akí, a proveé e promé hafnan na Boneiru ku un sistema ofisial pa rekohé awa shushi. Ku esaki nos isla ta kumpli ku e reglanan nobo for di e Dekreto di Establesimentu i Aktividat BES. Pero mas importante ainda: e ta evitá daño na naturalesa i hende.

Mara, pòmp, kla. Sin shushedat den laman

E funshonamentu ta simpel. Mara bo yate. Konektá e slan. Pòmp manda afó. Kla.  Via un sistema será ta kondusí e awa shushi (e asina yamá ‘awa pretu’) na un tanki di almasenahe. Djei e ta bai pa e planta di purifikashon di awa di kloaka di WEB Boneiru. No tin lèkmentu. No tin kontakto ku awa di laman òf otro awa den naturalesa.

A diseñá e instalashonnan pa nan ta fásil den uso. Di e manera ei e doñonan di barku por deshasí rápidamente i sin rompekabes di nan awa shushi. Tur kos ta kumpli ku tur eksigensia. Tur kos ta funshoná.

Esaki ta maneho di awa shushi estilo boneriano: efektivo, limpi i reglá konhuntamente.

Awa mas limpi, hende mas salú, ref mas fuerte

Ku yegada di e instalashonnan pa deshasí di awa shushi, un kontaminadó silensioso ta disparsé for di nos laman. Esaki ta bon notisia pa nos refnan, pero tambe pa landadónan, sambuyadónan i tur hende ku ta gusta awa limpi. Danki na e fasilidat akí, ménos awa no-purifiká ta kore bai laman. Esaki ta nifiká awa mas kristalino, ménos malesa i un ambiente mas seif pa hende i bestia.

Ku e proyekto akí, Boneiru ta mustra ku turismo i naturalesa debidamente por bai huntu. Ku reglanan ta funshoná, si nan haña sosten adekuá. I ku protekshon di ref ta kuminsá ku eskohonan inteligente hasí na tera.

E instalashonnan pa deshasí di awa shushi ta hasi nabegashon limpi e norma. I nan ta pone Boneiru fuertemente riba mapa komo destinashon sostenibel pa yate.