A resultá ku tur 47 empresa di garashi ku nan a kontrolá den luna di mart 2025, ta violá e reglanan di medio ambiente. Direktorado di Supervishon i Mantenshon di Lei ta bati alarma: protekshon di suela defisiente, almasenamentu insigur di supstansianan peligroso i falta di fasilidatnan básiko ta sòru pa riesgo pa hende i medio ambiente. A ehekutá e kontròlnan den kolaborashon ku Omgevingsdienst Nederland(ODNL), komo parti di e proyekto Empresa di Garashi 2025.
Protekshon di suela defisiente i siguridat kontra kandela
En total nan a konstatá 202 violashon. Prinsipalmente protekshon di suela ta laga di deseá: na 32 empresa tabata falta baki pa lèk i 11 garashi ta traha sin ningun forma di protekshon di suela. A resultá tambe ku 21 empresa no tin material di apsorshon pa limpia zeta òf otro tipo di líkido.
Aparte di esaki, siguridat kontra kandela hopi biaha no ta na òrdu. Den vários shòp tabatin bòter di gas sin siguridat òf nan tabata traha sin aparato di paga kandela aprobá.
Niun empresa no tabata kompletamente na òrdu
Loke ta remarkabel: niun empresa di garashi no a sali sin violashon for di e inspekshon. Mayoria di e garashinan no ta kumpli ku e obligashon di notifikashon na Entidat Públiko Boneiru, miéntras ku esaki ta obligatorio pa lei. ‘E situashon ta serio,’ segun direktorado di Supervishon i Mantenshon di Lei. ‘Si no tuma akshon, ta surgi daño na suela, aire i awa – ku tur e konsekuensianan pa salubridat públiko.’
Empresanan ta haña 8 siman pa pone nan asuntunan na òrdu
A registrá tur violashon por eskrito. Doñonan di garashi tin 8 siman di tempu pa implementá mehorashon. Despues ta sigui un reinspekshon. Si e situashon keda sin kambio, e ora ei direktorado di Supervishon i Mantenshon di Lei ta imponé un asina yamá ‘last onder dwangsom’: un but inkluyendo e obligashon pa ainda tuma medida.
Enkuentro di informashon: buska solushon huntu
Dentro di poko direktorado di Supervishon i Mantenshon di Lei ta organisá un enkuentro pa tur empresa di garashi. Durante e seshon akí ta papia tokante e konklushonnan i e empresarionan ta haña splikashon tokante e reglanan, e riesgonan i e adaptashonnan nesesario. Direktorado di Supervishon i Mantenshon di Lei ta enfatisá: ‘Nos no ke mantené lei so, pero nos ke yuda tambe. Huntu nos ta hasi e sektor mas seif i mas sostenibel.’
Akshon ta nesesario. Awor akí
E yamada na doñonan di garashi ta klarito: no sinta warda kiko ta bai pasa, pero tuma akshon mesora. Esunnan ku ainda tin pregunta òf ku tin mester di yudansa, por tuma kontakto ku direktorado di Supervishon i Mantenshon di Lei. Protekshon di naturalesa i siguridat na Boneiru ta rekerí kompromiso di tur hende.
