Shushi ilegal ta hasi daño na nos naturalesa i na nos salú

Dùmpmentu ilegal di shushi ta un problema kresiente na Boneiru. Kada biaha tin mas hende ta dùmp saku di shushi, mueble bieu i shushi di konstrukshon kantu di kaminda, den mondi òf den serkania di barionan residensial. Esaki no ta solamente un mahos bista, pero e ta peligroso tambe pa nos salú, pa nos bestianan i pa nos naturalesa.

‘Kisas ta parse algu inosente pa pone shushi na un sitio kaminda niun hende no ta mir’é, pero e tin konsekuensia grandi’, segun un bosero di Direktorado di Supervishon i Mantenshon di Lei. ‘Shushi ta atraé plaga, e ta kontaminá suela i e por kondusí na peliger pa kandela. Shushi por hasi daño na nos kamindanan i na nos kloaka tambe.’

Kampaña kontra dùmpmentu ilegal

Pa atendé ku e problema akí, Supervishon i Mantenshon di Lei a kuminsá ku un kampaña nobo. E meta: laga hende mira dikon dùmpmentu ilegal ta asino dañino, i kon bo mes por aportá na un Boneiru limpi i seif.

E kampaña ta pasa riba diferente medio di komunikashon:    

• Na radio i televishon bo ta tende kua ta e konsekuensianan di dùmpmentu di shushi – i kon huntu nos por stòp esaki.
• Riba medionan sosial nos ta kompartí vários tep útil tokante separashon, kolektamentu i transporte di shushi.
• Den entrevista na televishon i radio empleadonan di Supervishon i Mantenshon di Lei ta konta tokante nan trabou i kiko diariamente nan ta topa kuné.

Tur hende por yuda

Gobièrnu só no por solushoná e problema akí. ‘Nos tin mester di yudansa di nos habitantenan i nos empresanan,’ segun e bosero. ‘Tira bo shushi afó na e sitio korekto, mèldu dùmpmentu ilegal i hala atenshon di otro hende ora esaki ta nesesario. Solamente huntu nos ta tene Boneiru limpi.’