Boneiru a tene limpiesa: a kita míles di kilo di shushi for di riba kaya

Riba djasabra 17 di ougùstùs sentenáres di hende a drenta den akshon durante e promé edishon di Clean Up Day ‘Boneiru: Limpi i Bunita’. Huntu nan a hasi Boneiru mas limpi i mas bunita. E resultado? Nan a kita mas ku 28.000 kilo di shushi for di riba kaya, for di kantu di laman i for di den mondi.

For di bòter di plèstik i stul kibrá te frishidèr bieu: e shushi ku nan a kolektá ta mustra kuantu shushi tin plamá te ainda tur kaminda den nos naturalesa. Diputado Nina den Heyer, ku tambe a yuda hasi limpiesa, ta orguyoso ku dedikashon di e hendenan. Pero e ta preokupá tambe.

‘Mi ta sumamente kontentu ku asina tantu boluntario, ku huntu a hisa nan manga di kamisa,’ segun Den Heyer. ‘Pero ta konfrontativo tambe pa mira kuantu shushi nos ta topa tur kaminda ainda. Esaki ta nifiká ku nos tin ku sigui traha riba konsientisashon i kambio di komportashon.

E akshon tabata parti di e kampaña Boneiru Limpi i Bunita. E meta: tene nos isla limpi, huntu ku nos komunidat. Ya kaba e organisashon ta wak padilanti den direkshon di un ròndu nobo di limpiesa mas lat den e aña akí.

Bo tambe ke yuda? E ora ei tene e anunsionan na bista via e página di Facebook di Boneiru Limpi i Bunita.