Entidat públiko Boneiru a kuminsá e siman akí ku pagamentu di e fokonan di kandela na e lèntfel na Lagun. Ta trata di kandela ku ainda ta kimando bou di tera, i ta loke a resta despues di e kandelanan grandi di e último lunanan.
E trabounan ta kuminsá kaminda e konstrukshonnan ta i despues nan ta bai den direkshon di e entrada. Nan ta traha entre 8 or di mainta i 3 or di tramèrdia, pa limitá molèster pa e bisindario.
Durante un kontròl anterior, nan a haña mas òf ménos 15 foko di kandela. A identifiká esakinan ku kámaranan infrakòrá i ku midimentu di temperatura. Nan ta koba kaminda e kandelanan ta, paga nan koutelosamente ku awa i despues ta tapa nan ku greis. Esaki ta un tipo di piedra ku ta yuda tene oksígeno afó.
E meta ta klarito: logra haña e situashon bou di kontròl i sòru pa un ambiente seif. Pa e habitantenan, pero tambe pa e hendenan ku ta traha na òf rònt di e lèntfel.
E bisindario a haña informashon
Dia 24 di yüni tabatin un enkuentro pa e habitantenan i otro interesadonan. Nan a haña splikashon tokante kiko ta bai pasa, dikon i den kuantu tempu. Tambe e presentenan por a hasi pregunta i kompartí nan preokupashonnan. Durante e trabounan entidat públiko Boneiru ta sigui komuniká aktivamente ku e bisindario.
E aserkamentu no ta keda na paga kandela so
Entidat públiko Boneiru ta trahando riba mehorashon struktural tambe pa loke ta trata maneho di shushi. Ta bin mas atenshon pa prosesamentu i almasenamentu seif di shushi riesgoso, manera tayer i plèstik. Ku esaki gobièrnu ke evitá kandela nobo den futuro.
Tin molèster? Mèldu esaki.
Bo ta eksperensiá molèster di huma, holó òf algu otro durante e trabounan? E ora ei tuma kontakto ku entidat públiko Boneiru via +599 777 2243.
