Ofisialmente Kolegio Ehekutivo di Boneiru a hala atenshon di SELIBON pa loke ta trata su responsabilidat pa e sitio di depositá shushi na Lagun. Si e kompania di shushi no tuma akshon kontra e kandelanan kontinuo (bou di tera) promé ku 1 di aprel, e ora ei ta sigui un obligashon atministrativo. Esaki ta nifiká ku Kolegio Ehekutivo mes lo intervení – riba gastu di SELIBON.
Pa basta tempu kaba e situashon na Lagun ta preokupante. Na e sitio di depositá shushi ku regularidat tin kandela, ku ta peligroso pa salubridat públiko i dañino pa naturalesa i medio ambiente. No opstante atvertensianan repetitivo, ainda SELIBON no a logra pa atendé den un forma struktural ku e kandelanan akí. Tambe tin falta di un bon plan pa evitá kandela nobo.
Protekshon di suela i salubridat ta na peliger
Banda di pagamentu di e kandelanan, SELIBON tin ku tapa sierto partinan tambe di e sitio di depositá shushi ku no ta den uso mas. Esaki ta nesesario pa evitá polushon di e suela i e awa den suela. Den esaki protekshon di salubridat públiko i medio ambiente ta sentral.
For di inspekshon di Direktorado di Supervishon i Mantenshon di Lei ta resultá ku aktualmente SELIBON no ta kumpli ku e obligashon di kuido legal. E kompania no tin un plan di kombatimentu di kandela i tampoko un plan operashonal di maneho di shushi, miéntras ku esakinan ta obligatorio. Pa e motibu akí a duna awor un atvertensia formal: rekuperá esaki dentro di kuater siman, òf Kolegio Ehekutivo ta tuma over.
Bèkgrount: stagnashon debí na ‘indeplaatsstelling’
Pa lunanan largu e trayekto di mantenshon di lei na Lagun a para ketu, pa motibu ku Representante di Reino tabata temporalmente outorisá pa aktua. Pero no a tuma ningun medida. Awor akí e situashon akí a kambia. Resientemente wes a disidí ku e ‘indeplaatsstelling’ akí no tabata hustifiká. Debí na esaki e kompetensianan ta bèk serka Kolegio Ehekutivo, ku awor ta aktuando ku diligensia.
Aserkamentu mester bira rápido i visibel
Kolegio Ehekutivo ta enfatisá ku a bira tempu pa akshon klarito. No tin mag di ignorá e molèster i e riesgonan na Lagun mas. Boneiru meresé un prosesamentu di shushi seif, limpi i bon manehá – na interes di tur habitante.
