Durante Bario Limpi 2026 nan a rekohé 45,9 tòn di shushi. For di djabièrnè 18 te ku djadumingu 20 di sèptèmber den 12 bario di Boneiru habitantenan por a deshasí di nan shushi gròf i shushi
di riba kaya den kònteinernan spesial di shushi. E último dia di e akshon a kai huntu ku World Cleanup Day – Dia Mundial di Limpiesa.
Ku Bario Limpi, Entidat Públiko Boneiru i Selibon NV ke hasi mas fásil pa habitantenan tira shushi na e lugá korekto. Di e manera akí e 45,9 tòn di shushi ku nos a rekohé den e wikènt ei, no ta resultá kantu di kaminda òf den naturalesa.
“Kada tòn ku nan depositá den un kònteiner, no ta resultá kantu di kaminda òf den
naturalesa,” segun Sherman Blanken, hefe di departamento di Proyekto i Taskforce na
Direktorado di Supervishon i Mantenshon di Lei. “Ku Bario Limpi nos ta sòru pa ta mas
fásil pa nos habitantenan tira shushi afó na un manera adekuá. Na mes momentu nos ta sigui kontrolá pa loke ta trata dùmpmentu ilegal. Shushi den naturalesa ta hasi daño na henter nos isla.”
Selibon tambe ta enfatisá ku limpiesa no ta stòp despues di un wikènt di rekohementu di shushi. “Un bario limpi ta kuminsa ku e manera ku kada dia nos ta anda ku shushi,” segun Clinton Kirindongo, mènedjer di Relashon ku Kliente i Komunikashon di Selibon NV. “Nos ta spera ku despues di Bario Limpi tambe nos habitantenan ta sigui anda konsientemente ku esaki.”
Entidat Públiko Boneiru i Selibon ta gradisí tur habitante i tur hende ku a yuda ku organisashon i ehekushon di Bario Limpi.
