For di djabièrnè 18 te ku djadumingu 20 di sèptèmber den diesdos bario na Boneiru tin baki di shushi grandi pa Bario Limpi. Den e bakinan akí habitantenan por depositá shushi doméstiko grandi i pisá i shushi ku hende ta tira riba kaya. Di e forma akí Entidat Públiko Boneiru i Selibon ke hasi mas fásil pa habitantenan pa deshasí na e manera korekto di nan shushi i kombatí dùmpmentu ilegal di shushi. E aña akí e último dia di Bario Limpi ta kai huntu ku World Cleanup Day – Dia Mundial di Limpiesa riba djadumingu 20 di sèptèmber. Riba e dia akí rònt mundu hendenan ta tene limpiesa den nan bisindario. Habitantenan di Boneiru tambe por partisipá pa medio di hasi nan kaya òf nan bisindario limpi i depositá e shushi ku nan kolektá den e baki di shushi den nan bario.
Kiko tin mag di bai den e bakinan di shushi?
E bakinan di shushi ta intenshoná pa shushi doméstiko grandi i pisá, manera muebel, kolchon, aparato bieu, artíkulo pa uso den kas, sobrá di palu i kantidat chikitu di shushi di kurá. No tin mag di tira shushi di konstrukshon, fèrf i produkto kímiko, produkto di petrolio, bateria di outo, asbèst, shushi médiko, kantidat grandi di bio-fertilisante i bòter di gas den e bakinan di shushi. Pa e tiponan di shushi akí tin otro regla na vigor. Habitantenan por hiba e tiponan di shushi akí na Selibon òf na e punto di rekolekshon destiná pa esaki.
Na unda e bakinan di shushi ta?
| Bario | Sitio |
|---|---|
| Rincon | Sentro di Bario Rincon |
| Tra’i Montaña | Vèlt di futbòl Tra’i Montaña |
| Antriol Pabou | Kaya Gatu |
| Antriol Pariba | Parke Patun Saragoza |
| Amboina | Sentro di Bario Amboina |
| Nikiboko Nort | Sentro di Bario Nikiboko |
| Nikiboko Sùit | Parke L. Clarinda |
| Tera Kora | Sentro di Bario Tera Kòrá |
| Nort’i Saliña | Sentro di BarioNort’i Saliña |
| Belnem | Entrada di Kaya Ir. R. Statius van Eps |
| Hato | Entrada di Kaya Diamanta, na Curoil Hato |
| Playa | Stadion di futbòl Playa |
Shushi ku hende laga atras riba kaya òf den naturalesa, ta sòru pa molèster i por atraé plaga i lugá di brui pa sangura. Pa e motibu akí Entidat Públiko Boneiru i Selibon ta pidi habitantenan pa hasi uso di e bakinan di shushi i no dùmp shushi den naturalesa.
Banda di esaki, riba djadumingu 20 di sèptèmber, habitantenan por partisipá na World Cleanup Day – Dia Mundial di Limpiesa pa medio di hasi limpi den nan kaya, den nan bisindario òf den nan serkania.
