Desinfekshon UV na Planta di Purifikashon di Awa Shushi

Pa awa seif i reusabel na un isla kaminda kada gota ta konta

Awa ku promé a sali for di bo ducha, awor ta alimentá mata yòn den kunuku òf den hardin na un risòrt. E instalashon di UV na Boneiru su Planta di Purifikashon di Awa Shushi ku ta hasi esei posibel ta haña un ‘upgrade’ grandi. Nan ta remplasá i amplia e instalashon bieu. Pa medio di esaki nan por desinfektá e awa shushi purifiká (e efluente) mas mihó ainda. Di e manera akí por reusá e efluente den un forma mas seif pa irigashon, kompletamente konforme e normanan mas estrikto ku ta na vigor pa esaki.

Kada gota ta konta

Awa shushi ku no ta bon purifiká, por ta dañino pa hende i naturalesa. Sigur na un isla manera Boneiru, kaminda kada gota ta konta i kaminda nos refnan vulnerabel ta keda pegá ku kosta. Danki na e instalashon nobo di UV, nos ta hasi uso sabí di loke nos tin kaba: awa limpi for di awa shushi. E sistema ta funshoná for di luna di novèmber 2023 i ta suministrá awa di irigashon ku ta asina limpi, ku sin ningún problema e ta kumpli ku e normanan di mas severo. Esaki ta yuda pa nos terenonan di agrikultura bira bèrdè, e ta mantené e risòrtnan bèrdè i e ta evitá dùmpmentu innesesario.

Asin’aki e ta funshoná na Boneiru

E instalashon anterior a resultá di no ta sufisiente fuerte pa e tipo di efluente ku ta bini liber na Boneiru. “Nos a laga tèst e awa detayadamente i laga rekalkulá e kapasidat,” asina un tékniko di e instalashon di purifikashon ta konta. “For di esei a bini un solushon nobo di UV ku sí ta funshoná pa nos situashon.” Awor nos ta desinfektá e awa mesora, promé ku e bai pa empresanan di agrikultura òf pa e ret di distribushon. Di e manera akí nos ta tene e awa seif i usabel.

Pa kunukero, pa turista i pa laman

E instalashon nobo ta sòru pa awa di irigashon konfiabel i higiéniko. Asina reuso ta bira mas fásil i mas ampliamente aplikabel. Ménos patógeno (mikro-organismo ku ta kousa malesa), mas rendimentu den kunuku, ménos preshon riba e ekosistema. I alabes: ménos awa shushi ku ta disparsé den laman. Di e manera akí nos ta protehá nos refnan i na mes momentu nos ta edifiká un Boneiru mas outosufisiente.