Loke nos ta pasa pa mañan

Na Boneiru tur kaminda futuro ta krese rònt di nos. Den mata yòn ku ta saka rais. Den e awa ku ta kore atraves di e paisahe. Den palu bieu, den kaminda silensioso, den baranka ku diferente kapa i den e sitionan kaminda mucha ta siña wak nan isla. Nos naturalesa ta karga loke tabatin promé ku nos. I loke awe nos ta trata ku kuido, nos ta pasa pa esunnan ku ta bini despues di nos.

Ku Nos ta biba di naturalesa nos ta mustra kiko Boneiru tin mag di pasa pa otronan: naturalesa ku ta sigui krese, sitionan ku ta mantené nan nifikashon i un isla ku mañan tambe ta sinti manera Boneiru ainda.

Esensia di e kampaña

Kuido ta kuminsá ku mira loke tin balor. E bèrdè ku ta surgi despues di áwaseru. E palunan ku ta duna sombra. E awa ku ta trese bida. E kosta, e kunuku, e kasnan bieu, e barankanan i e paisahenan ku ta pertenesé na Boneiru.

Ku Nos ta biba di naturalesa nos ta mustra ku kuido di naturalesa ta kuido pa despues tambe. Pa e muchanan ku ta krese akinan. Pa e sitionan kaminda ta surgi rekuerdo. Pa e naturalesa ku tin mester di tempu pa krese, pa rekuperá i pa keda eksistí.

Pa e motibu akí traspaso ta sentral den e kampaña akí. Pasobra loke nos hasi awe, no ta kaba awe. Bo ta mira loke tin nifikashon. Bo ta sinti loke bo ke konservá. I den eskohonan chikitu bo ta mustra: nos ta biba di naturalesa.

Na unda bo ta mira e kampaña

E imágennan di e kampaña ta visibel tur kaminda den luna di aprel, mei i yüni: den korant, riba billboard digital, riba pantaya den establesimentunan, den aviso ònlain i den bo ‘social feed’.

Kada imágen ta mustra algu di loke Boneiru ta pasa pa otronan. Vegetashon yòn na Tera Barra. E awa i paisahe di Fontein. E kapanan di baranka a lo largo di Queen’s Highway. Imágennan ku ta laga nos sinti kon kresementu, tempu i kuido ta karga e storia di Boneiru.

Atraves di mi wowonan

Loke bo ta pasa pa otronan, hopi biaha ta kuminsá ku para wak. Pa e motibu akí den e seri di potrèt ‘Atraves di mi wowonan’ nos ta konta kon grandi i chikí huntu ta wak Boneiru. No manera potrèt. No manera momentunan ku a tuma un ‘pose’. Pero komo imágennan silensioso kaminda naturalesa tin e ròl prinsipal.

Un mayor i su yu ta wak laman òf nan ta para na un kas di bara. Dos man ta planta un palu yòn. Un wayaká bieu ta mustra nos kiko tempu ta nifiká. Algun flamingo ta keda na un distansia. Un kaminata den e paisahe ta laga nos sinti kon amor pa naturalesa ta pasa pa otro hende. 

Huntu e seri ta mustra nos ku kuido pa Boneiru ta kuminsá djis pegá ku nos. Den kon nos ta mira. Den kon nos ta anda ku sitionan ku ta importante. Den loke mucha ta mira i keda kòrda di nos, i despues hasi esaki parti di nan mes.

Mañan ora mi bira grandi

Futuro tambe ta haña un bos den e seri di video Mañan ora mi bira grandi. Den tres video kòrtiku algun mucha ta wak Boneiru, manera nan ta spera di topa kuné bèk despues. Na Tera Barra esaki ta trata di tur kos ku ainda ta krese akinan. Na Fontein e ta bai tokante loke mester keda eksistí. Na Queens Highway tokante un isla ku despues tambe ta sinti ainda manera Boneiru.

Por mira e videonan riba Facebook i YouTube. Huntu ku e seri di potrèt Atraves di mi wowonan, nan ta mustra tokante kiko e kampaña akí ta bai: loke abo hasi awe, ta determiná nan mañan.