Boneiru ta pone un siguiente paso pa deshasí di desperdisio biomédiko. Na luna di yüli e di dos fase di transporte a kuminsá: na diferente momentu nan ta manda shete kònteiner èkstra ku desperdisio médiko bieu pa Oropa. Entretantu e promé barku a bai, e otronan ta sigui dentro di poko. E trabounan ta konektá ku e promé fase, kaminda na luna di aprel ya kaba na un manera seif nan a deshasí di sinku kònteiner ku desperdisio. Ku esaki porfin a bin moveshon den un problema ambiental ku pa hopi aña largu tabata skondí.
Esfuerso lokal i bon preparashon
E biaha akí tambe nan a atendé rigurosamente ku e preparashon. Henter e kadena a keda organisá efisientemente i nan a hasi uso di material spesial pa empake, suministrá for di Hulanda. E parti di empaketamentu i ponementu di e desperdisio kla pa transporte pa un gran parti ta na enkargo di un kontratista lokal ku tin eksperensia den e trabou akí.
Siman pasá atrobe nan a yena e promé barínan ku material bieu, bou di instrukshonnan estrikto di siguridat. Selibon a konfirmá ku tur kos ta kanando segun planifikashon.
Salú i medio ambiente na promé lugá
Desperdisio biomédiko – manera angua, vèrbant i otro material kontagiá – por kontené supstansia dañino. Pa e motibu akí tin reglanan internashonal severo na vigor pa transporte i prosesamentu di esaki. Danki na esfuerso di partnernan manera RMD, Selibon i Fundashon Mariadal, awor akí esaki ta tuma lugá na un manera responsabel na Boneiru.
Adelantá tur organisashon enbolbí a sigui un treinen spesial pa por ehekutá e trabou na un manera seif i kuidadoso.
Kimá na Bélgika
Nan ta transportá e kònteinernan via Hulanda pa Bélgika, kaminda na un manera seif e prosesadó Renewi ta kima e desperdisio. Pa medio di e aserkamentu akí Boneiru ta redusí e chèns di riesgo pa salú i nos isla ta kontribuí na un ambiente di biba mas limpi.
Kolegio Ehekutivo ta keda enbolbí
Kolegio Ehekutivo ta papia un biaha mas di un paso importante. “Nos ta kontentu ku e di dos fase akí tambe ta kanando sin ningun problema. Nos ta sigui vigilá e proseso minusiosamente, huntu ku nos partnernan.”
