Tiramentu di kabritu den Parke Washington Slagbaai ta stòp por lo pronto. Kolegio Ehekutivo i STINAPA a palabrá esaki despues di e diskushon ku a surgi e último simannan na Boneiru tokante e manera di aktua den e parke. Durante e paro temporal ta investigá si por saka mas kabritu bibu for di e parke i si nan por haña un otro destinashon na Boneiru.
Ta deshasí di e kabritunan pa duna naturalesa den Parke Washington Slagbaai un chèns pa rekuperá. Kabritu ku ta kana lòs ta kome palu i mata yòn promé ku nan por krese. Debí na esaki vegetashon ta disparsé i kada biaha e naturalesa original ta haña ménos espasio.
Mayoria kabritu ta bandoná e parke bibu
For di aña 2019 ta purba saka mas tantu kabritu posibel bibu for di e parke. Mas òf ménos 75 porshento ta bai bibu pa habitantenan, organisashonnan i misanan. E sobrá 25 porshento nan ta tira ora no logra saka e bestianan na un otro manera. Den sierto partinan di e parke kaminda a saka kabritu, por mira entretantu kiko resultado di esaki ta. Palu i mata yòn ta krese atrobe i e vegetashon a kuminsá rekuperá.
Kolegio Ehekutivo i STINAPA ke wak si por oumentá e kantidat di kabritu ku ta saka bibu for di e parke mas tantu ainda. Te na momentu ku tin mas klaridat tokante esaki, ta stòp ku tiramentu di kabritu.
