Un liña di kosta ku pokopoko ta kibra na pidapida. Un kunuku kaminda kada biaha tin mas shushi ta keda tras. Un paisahe ku ta bira mas seku ku ántes. No ta tur kambio bo ta ripará mesora. Tin ora ta te despues di tempu bo ta mira kuantu kos a kambia.
Ku varios imágen i storia nobo den e kampaña Nos ta biba di naturalesa, Entidat Públiko Boneiru ta pidi atenshon pa naturalesa di Boneiru i pa e kambionan ku ta visibel na diferente sitio na nos isla.
E kampaña ta laga nos mira sitionan rekonosibel. Sitionan kaminda nos habitantenan diariamente ta kore pasa, kana keiru, traha òf rekreá. Netamente einan ta bira visibel kon influensia humano i prosesonan natural ta kambia e paisahe. No di un dia pa otro, pero paso pa paso.
Pero kambio no ta e úniko storia.
Na Boneiru tur dia tin hende ta traha pa protehá, restorá i fortifiká naturalesa i medio ambiente. Organisashonnan, boluntarionan i habitantenan ta komprometé nan mes pa restorashon di ref di koral, fortifikashon di palu di mangel, kultivo di mata endémiko i protekshon di e palma sabal, ku na Boneiru só ta krese den mondi.
Den e lunanan binidero e storianan akí ta haña un lugá den e kampaña. Pa medio di video, potrèt i storia online nan ta hasi visibel kiko ta kambiando, pero tambe kiko hende ta hasi awe kaba pa konservá naturalesa balioso pa futuro.
Hopi di loke ta hasi Boneiru spesial ta parse opvio, pasobra semper e tabat’ei kaba. E kampaña akí ta invitá hende pa opservá nan alrededor di nobo. Tira un bista riba loke ta kambiando, pero tambe riba e trabou ku diariamente ta tumando lugá pa protehá naturalesa i medio ambiente pa futuro generashonnan.
Visibel na nos isla i online
Por mira e kampaña riba pantayanan digital, den medionan sosial i via medionan di komunikashon lokal. Banda di esaki riba e wèpsait por haña storia, proyekto i informashon di fondo ku ta konektá ku e tópikonan for di e kampaña.
Bo ke sa mas
Riba e wèpsait aki bo ta haña e storianan tras di e kampaña, proyektonan aktual, notisia, partnernan i informashon tokante naturalesa i medio ambiente na Boneiru.
