Riba djaluna 14 di aprel e promé sinku kònteinernan ku shushi biomédiko a sali pa Hulanda. Un paso importante pa loke ta trata aserkamentu responsabel di un problema riba tereno di Selibon ku pa hopi aña kaba niun hende no a atendé kuné.
Ta trata di shushi médiko, manera angua, verbant i otro material kontagiá, ku durante hopi aña tabata almasená den kònteiner bieu. Danki na uso di spesialistanan di RMD-Advies i Renewi awor akí ta prosesá i transportá e shushi akí na un manera seif.
Entrená promé, despues atendé
Promé ku e tim a kuminsá ku e trabou, e empleadonan a sigui un entrenamentu spesial. Asina nan tabata sa eksaktamente kon nan mester a paketá e shushi di nobo na un manera seif. Kuidadosamente nan a paketá e shushi bieu un biaha mas den material nobo ku no ta lèk, i despues di esei nan a pone e shushi den kònteinernan moderno, ku ta adekuá pa transporte internashonal.
No tin peliger pa salubridat públiko
Pa sa sigur ku e shushi no ta forma niun riesgo, durante e trabou GGD Boneiru a tuma muestra di e superfisienan. E bon notisia: nan no a topa ku bakteria ku ta kousa malesa.
E sobrá tambe nan ta bai transportá rápidamente
Den e simannan binidero nan ta atendé na e mesun manera ku sobrá di e shushi i mas rápido posibel nan ta saka esaki for di nos isla. Tur kos konforme e reglanan vigente, ku bista pa salú i medio ambiente.
Kolegio Ehekutivo a sinti alivio i ta keda alerta
Kolegio Ehekutivo ta papia di un paso importante padilanti. ‘Nos ta kontentu ku e proseso akí a ranka sali. Salubridat públiko i un ambiente di biba limpi ta bini na promé lugá. Nos ta sigui vigilá e proseso djaserka.’
