For di djárason 13 di novèmber RIVM (Instituto di Reino pa Salubridat Públiko i Medio Ambiente) ta investigando supstansianan dañino rònt di e sitio pa depositá shushi na Boneiru. E Servisio di Insidente Ambiental (Milieuongevallendienst – MOD) di RIVM ta bini nos isla spesialmente pa esaki.
Pa basta tempu kaba habitantenan tin preokupashon tokante posibel polushon di e bisindario. Pa e motibu akí nan ta investigá awor si tin supstansia for di den aire a keda depositá den suela i riba mata rònt di e lèntfel.
No ta trata pues di midimentu di e aire mes, manera nan a pensa anteriormente, pero di investigashon di loke a resultá riba suela kaba.
Na diferente sitio rònt di e lugá di depositá shushi e tim di investigashon ta bari stòf i ta tuma muestra di suela i vegetashon. Na Hulanda nan ta investigá e muestranan akí riba presensia di entre otro dioksina, metal pisá i PAK (karbon dañino ku por bini liber ora tin kimamentu).
E resultadonan mester hasi evidente si tin riesgo pa salú di hende ku ta biba den bisindario, i pa naturalesa. Asina ku e resultadonan ta konosí, ta kompartí esakinan ku pueblo.
