Den luna di desèmber e kampaña Bario Limpi a sòru pa resultadonan visibel. Durante tres wikènt di akshon nan a kolektá en total 132 tòn di shushi den diferente bario rònt Boneiru. Den e último ròndu, for di 19 te ku 21 di desèmber, un biaha mas nan a rekohé 38 tòn di shushi.
E akshon, un inisiativa di Direktorado di Supervishon i Mantenshon di Lei di Entidat Públiko Boneiru i Selibon NV, a pone habitantenan den moveshon. Vários baki di shushi temporal den e barionan a hasi posibel pa na un manera aksesibel deshasí di shushi gròf i otro tipo di shushi. Nan a hasi esaki na gran eskala. Tabata notabel kon kayanan i kuránan ku anteriormente tabata shushi, a haña un otro aparensia. Na final Selibon NV a limpia tur e sitionan kaminda tabatin kònteiner. Ku esaki nan a laga espasio públiko nèchi i seif atras.
Den vários bario nan a kolektá hopi shushi. Tera Kòrá a sobresalí ku 23 tòn. Na Nikibiko tambe nan a rekohé hopi shushi, esta 27,4 tòn den Nikiboko Nort i Nikiboko Sùit huntu. Ku esaki e bario akí tabata esun ku a kontribuí mas tantu na e total. “Nos ta mira kiko ta pasa ora hasi e trabou huntu,” segun Sherman Blanken, hefe di departamento di Proyektonan di Mantenshon di Lei i Taskforces. “Hendenan ta koperá. Nan ta kuida nan bario. Esaki ta hasi e diferensia.”
Ku Bario Limpi e organisashonnan enbolbí kier a sostené e habitantenan i hasi nan konsiente di importansia di un ambiente di biba limpi. E kantidat di hende ku a partisipá i e resultado ta mustra ku e disponibilidat akí t’ei. Un Boneiru mas limpi ta kuminsá den bario i ta krese ku loke hende ta hasi huntu.
