Mainta tempran piskadónan ta subi laman. Sambuyadónan ta bin Boneiru pa nos refnan di koral. Den parti sùit tin produkshon di salu ku ayudo di solo i awa di laman. I na Lac bientu ta sòru pa sirkunstansianan ideal pa koredónan di windsurf. Tur kaminda naturalesa ta presente na Boneiru. E ta sòru pa kuminda, trabou i entrada, i e ta forma parti di bida na nos isla. Ku e último kampaña di aña 2026 den Nos ta biba di naturalesa, Entidat Públiko Boneiru ta mustra kuantu kos di nos bida diario i di nos ekonomia ta dependé di naturalesa.
Naturalesa ta sòru pa trabou i entrada
Laman ta proveé piská i ta duna e piskadónan un entrada. E refnan di koral ta atraé bishitante for di henter mundu. Di e manera akí hopi hende ta gana nan pan den turismo. Solo i awa di laman ta importante pa produkshon di salu. Kunukeronan ta hasi uso di nan kunuku pa kultivá kuminda. E kuebanan, e áreanan di kosta i e paisahenan tambe ta pertenesé na Boneiru. Nan ta konta algu tokante historia i kultura di nos isla i nan ta forma parti di e manera ku hendenan ta biba i traha akinan. E kampaña ta mustra e diferente aspektonan di Boneiru, hasiendo uso di sitionan i aktividatnan konosí na nos isla.
Esaki tambe ta importante pa futuro
Loke naturalesa ta duna nos, no ta algu opvio. E manera ku nos ta anda ku nos laman, ku nos tera i ku nos paisahe, ta determiná kiko ta disponibel despues ainda. Ku Nos ta biba di naturalesa Entidat Públiko Boneiru ta pidi atenshon pa balor di nos naturalesa i pa importansia di anda kuidadosamentu ku esaki.
Lesa riba e página di kampaña di Nos ta biba di naturalesa mas tokante naturalesa su ròl den nos bida diario na Boneiru.
