Na Boneiru nan a kuminsá ku un proyekto spesial: Sabal Palm Park. E parke nobo di naturalesa akí ta bini pa protehá e Sabal Palm ku ta asina skars. Na mes momentu e ta bira un sitio bunita kaminda habitantenan i bishitantenan por kana keiru, kore baiskel i siña tokante naturalesa.
E Sabal Palm ta krese solamente na Boneiru. Ántes na hopi lugá por a topa ku e palma akí na nos isla, pero awor ta na un solo sitio so nos ta hañ’é: kantu di kaminda di bai Sorobon. Kabritu i buriku ta kome palma yòn, di manera ku kada biaha tin ménos Sabal Palm. Sin protekshon e palma akí por ekstinguí.
Pa e motibu akí ta bini awor e Sabal Palm Park. Den e parke akí e Sabal Palm ta haña espasio atrobe pa krese. Otro mata i bestia den e área akí tambe ta probechá di esaki. I e parke ta bira aksesibel pa tur hende. Aworó bo por kana keiru, kore baiskel i siña tokante e naturalesa spesial di Boneiru den e parke akí. Sin hasi daño na mata i bestia.
A pone e promé pasonan
E parke ta bini den bisindario di Lima. Ya kaba a hasi un komienso ku ponementu di un kurá. E kurá akí ta importante: e ta tene kabritu i buriku ku ta kana lòs pafó, di manera ku e Sabal Palm yòn por krese i bira grandi. En total ta bini 3,25 kilometer di kurá. Di esaki ya kaba 675 meter ta kla.
Kiko mas mester bini ainda?
Den e próksimo lunanan nan ta sigui traha riba e parke. Ta bini un entrada ku un porta di kurá, lugá pa stashoná outo i kaminda pa hende ku ta kana keiru i pa koredó di baiskel. Nan ta pone bòrchi di informashon tambe, di manera ku aworó bo ta siña tur kos tokante naturalesa durante bo bishita. Apertura di e parke ta planiá pa despues di mas òf ménos un aña.
Diputado Cicilia ta orguyoso: ‘Ku e parke akí nos ta protehá algu úniko. Na mes momentu nos ta krea un sitio kaminda tur hende por disfrutá di nos naturalesa i siña di esaki.’
E proyekto ta na enkargo di BonBèrdè B.V. i ta keda finansiá ku medionan for di e Plan di Maneho di Naturalesa i Medio Ambiente Hulanda Karibense (Natuur- en Milieubeleidsplan Caribisch Nederland – NMBP). Asina ’ki Boneiru ta bolbe pone un paso padilanti atrobe den protekshon di su naturalesa.
