Ta un bista hopi tristu: banda di e kònteinernan di shushi na Punta Kalbas tin un kantidat di shushi tirá abou. No djis un saku chikitu ku a bula bai, pero shushi gròf, i asta loke a sobra di un fiesta. Kantu di Kaminda Sorobon tambe tin shushi bentá. Nos naturalesa ta haña gòlpi – i nos habitantenan, nos bestianan i Boneiru su imágen tambe.
Entidat Públiko Boneiru i Selibon ta hopi preokupá. Prinsipalmente e oumento di dùmpmentu ilegal di shushi rònt di Lac i Punta Kalbas ta sòru pa preokupashon. E polushon akí ta afektá e ambiente di biba di entre otro nos flamingonan i otro bestianan vulnerabel, pero tambe di hendenan ku ta biba akí òf ku ta bishitá Boneiru.
“E komportashon akí ta inakseptabel,” segun Direktorado di Supervishon i Mantenshon di Lei. “Esun ku dùmp shushi, ta afektá nos naturalesa, nos siguridat i habitalidat di nos tur. Boneiru ta di nos tur i pues nos responsabilidat konhunto tambe.” Dùmpmentu di shushi na sitionan kaminda esaki no ta pèrmití, ta kastigabel.
Durante akshonnan di limpiesa e mantenedónan di lei ta investigá si tin kualke informashon den e shushi ku ta kondusí na e malechor. E personanan ku violá lei ta riska un but haltu. Selibon ta bai limpia e sitionan pa evitá mas daño. Banda di esaki nan ta konsiderando medidanan adishonal, manera seramentu di e kamindanan ku ta bai e sitionan konosí di dùmp shushi.
Bo tin shushi? Deposit’é na e sitio korekto.
Bo ta mira ku tin hende ta dùmp shushi? Bati alarma serka Supervishon i Mantenshon di Lei.
Solamente asina nos por aktua, promé ku e daño bira mas grandi.
