Resientemente diputado Anjelica Cicilia a papia ku representantenan di Bonaire Nature Platform (Plataforma di Naturalesa Boneiru) tokante kon nan por traha huntu ku un solo meta: protekshon di Boneiru su naturalesa.
Durante e kòmbersashon a bira evidente ku kolaborashon ta esensial. No solamente na nos isla mes, pero tambe den direkshon di Den Haag i otro tumadónan importante di desishon. ‘Si nos komo organisashonnan di naturalesa huntu ku gobièrnu laga tende un solo bos, nos ta mas fuerte,’ segun diputado Cicilia. ‘Esei ta importante pa por protehá nos naturalesa berdaderamente bon.’
Bonaire Nature Platform ta un laso di kolaborashon di organisashonnan ku ta komprometé nan mes pa koral, palu di mangel, bida bou di laman, rekuperashon di naturalesa i edukashon. Pensa riba BonBèrdè, CARIBSS, Coastal Dynamics, Echo, Internos, Mangrove Maniacs, Reef Renewal, Sea Turtle Conservation Bonaire, STINAPA, Tera Barra i Fondo Mundial di Naturalesa Hulanda (WWF-NL). Kada un ta aportá ku nan propio konosementu i eksperensia.
Huntu nan a fiha sinku prioridat pa e añanan binidero:
- Rekuperashon di ref di koral
- Mantenshon di lei pa loke ta trata protekshon di naturalesa den un forma mas severo
- Atendementu ku kabritu i buriku ku ta kana lòs
- Anda na un manera sostenibel ku awa di yobida
- Mehorashon di maneho di awa shushi
Segun e diputado, e kolaborashon ku e plataforma ta ‘prometedor i nesesario.’ E ta ansioso pa mira mas palabrashon i akshon konhunto. ‘Naturalesa ta di nos tur. Solamente huntu nos por sòru pa Boneiru keda bunita i habitabel pa e siguiente generashonnan tambe.’
