Kuantu piská tin ainda den nos laman? Kon ta bayendo ku piskamentu na Boneiru? I kiko ta nesesario pa por sigui piska den futuro tambe? Huntu ku e piskadónan, departamento di Agrikultura, Krio di Bestia i Piskamentu ke haña un kontesta riba e preguntanan akí.
Pa e motibu akí LVV a kuminsá ku un proyekto nobo. E meta: akumulá mihó informashon tokante piskamentu rònt di Boneiru. E informashon akí ta yuda pa mantené e sektor di piskamentu salú – no solamente awor, pero tambe pa e generashonnan despues di nos.
Ta pidi piskadónan pa partisipá
LVV ta hasi un yamada riba tur piskadó pa kompartí nan konosementu i eksperensia. Por hasi esaki den un forma hopi simpel. Bo ta indiká por ehèmpel:
- kuantu ora bo tabata riba laman,
- kuantu piská bo a kue (i ki tipo di piská),
- kon grandi i kon pisá e piská tabata,
- na unda mas òf ménos bo a piska,
- kon bo a piska (material/método),
- òf ku bo ta piska ku un charter òf nò.
Asta si bo no kue niun piská, esaki ta importante pa mèldu. Esaki tambe ta bisa algu tokante e kantidat i populashon di piská.
Bo informashon, bo privasidat
Nan ta prosesá tur informashon na un manera konfidensial i anónimo. Nan no ta nota bo nòmber ni number di bo boto. Na Hulanda nan ta analisá e informashonnan. Despues di esei, kada seis luna LVV ta kompartí un bista general ku tur piskadó i ku nos komunidat. Di e manera akí huntu nos ta keda na altura di e desaroyonan den nos laman.
Dikon esaki ta importante
Bida na Boneiru ta fuertemente konektá ku laman. Pa hopi hende piskamentu ta un fuente di entrada, di orguyo i di tradishon. Pero sin informashon konfiabel nos no por protehá piskamentu bon. Pa medio di partisipá, bo ta yuda bo mes i bo ta yuda futuro di piskamentu na nos isla.
Bo ta piskadó i bo ke partisipá? Òf nan no a aserká bo ainda, pero bo ke duna bo aporte sí? E ora ei tuma kontakto ku LVV via e number di telefòn +599 717 6734.
Huntu nos ta mantené nos piskamentu fuerte. Pa awe, pa mañan i pa e añanan despues.
