Riba djaluna 21 di òktober Kolegio Ehekutivo a risibí e rapòrt di inspekshon di Inspekshon di Ambiente di Biba i Transporte (Inspectie Leefomgeving en Transport – ILT). E rapòrt ta bai tokante Selibon, e organisashon ku na Boneiru ta responsabel pa kolektá i prosesá shushi. E inspekshon a tuma lugá na fin di luna di ougùstùs.
A papia ku Representante di Reino tokante e promé konklushonnan for di e rapòrt. Kolegio Ehekutivo ke studia e rapòrt kuidadosamente promé ku pone mas paso. Diputado Abraham: ‘Prosesamentu di shushi ta mishi ku nos tur. Nos ke sa sigur ku Selibon ta traha na un manera seif i limpi i segun regla. Nos ta sigui vigilá e situashon, pa wak si tur kos ta kana bon.’
Entretantu Konseho Insular tambe a risibí e rapòrt. Na un momentu mas lat Kolegio Ehekutivo lo reakshoná mas ampliamente i indiká kua ta e medidanan ku eventualmente ta nesesario.
Kiko Inspekshon di Ambiente di Biba i Transporte ta hasi eksaktamente?
Inspekshon di Ambiente di Biba i Transporte ta un instansia hulandes ku ta kontrolá si organisashonnan ta tene nan mes na e leinan i reglanan ku ta protehá nos ambiente di biba. Pensa riba kalidat di aire, prosesamentu di shushi, transporte i siguridat.
E rapòrt ta un señal importante. E ta yuda Boneiru mehorá su maneho di shushi i hasi su ambiente di biba mas limpi pa su habitantenan i su generashonnan di futuro.
