Na vários bich i área di kosta di Boneiru tin un prohibishon na vigor pa bai ku kachó. Nan a bini ku e prohibishon akí pa protehá tantu nos bishitantenan komo naturalesa i e ta konta tambe pa kachó ku nan ta kana kuné mará.
Kada biaha mas tantu hende ta bai bich ku nan kachó. Esaki ta kondusí na situashonnan kaminda siguridat di otro bishitantenan por ta bou di preshon. Pa evitá insidente ku mordementu i otro riesgonan, a designá sierto bichnan i áreanan di kosta spesífiko kaminda no ta pèrmití kachó.
Banda di esaki, protekshon di naturalesa ta hunga un ròl importante. Den áreanan vulnerabel, kachó por kousa daño, por ehèmpel pa medio di koba saka nèshi di turtuga. Nan por kousa molèster tambe den áreanan protehá manera Pekelmeer. Aparte di esaki, shushi di kachó ta forma un riesgo pa higiena na nos bichnan i pa e founa ku tin einan.
Pa duna klaridat a pone bòrchi na e sitionan en kestion. Riba e bòrchinan akí tin indiká na unda e prohibishon ta konta. Ta trata di entre otro Sorobon, Cai i e área entre Waf di Salt Company i Willemstoren, inkluso Pink Beach i Peliké.
Na otro partinan di kosta sí ta pèrmití pa kana ku kachó, pero únikamente a lo largo di e liña di kosta. Esaki ta konta pa e áreanan entre Punt Vierkant i Waf di Salt Company i entre Willemstoren i Sorobon.
E prohibishon ta konta pa entre otro Playa Lechi, Playa Pal’i Mangel, Fòrn’i Kalki, e área entre Waf di Salt Company i Willemstoren, Sorobon i Cai, Piedra Haltu, Tolo, Nukove i Klein Bonaire. Banda di esaki ta prohibí pa subi riba tereno di Cargill Salt Company sin pèrmit.
