Laman ta di importansia vital pa Boneiru. No solamente pa nos kultura i nos sistema di biba, pero tambe pa nos ekonomia i nos siguridat di kuminda. Pa e motibu akí departamento di Agrikultura, Krio di Bestia i Piskamentu (LVV) riba djárason 13 di novèmber a presentá e promé resultadonan di un investigashon di piskamentu na nos isla. E enkuentro a tuma lugá den Captain Don’s Habitat i mas ku 50 piskadó i otro interesadonan tabata presente.
Kiko ta landa den nos laman i kuantu?
Durante e anochi Dr. Dolfi Debrot di Wageningen Marine Research a splika kon e investigashon ta funshoná. Pa medio di midi na un manera sientífiko ki tipo di piská e piskadónan ta kue – i kuantu – ta surgi un imágen mas klarito di e populashonnan di piská rònt di Boneiru. Esaki ta yuda pa hasi e eskohonan korekto pa futuro.
Un sektor fuerte ta kuminsá ku bon sifra
E investigashon, ku a bira posibel pa medio di finansiamentu for di ministerio di Agrikultura, Piskamentu, Siguridat di Kuminda i Naturalesa (LVVN), ta forma e base pa un sektor sostenibel i hustu di piskamentu. Pasobra pa den futuro hasi palabrashon tokante kuantu piská nos tin mag di kue, Boneiru mester por proba kon importante piskamentu ta pa nos. Ku echo i sifra nos ta mas fuerte – tambe den negosiashonnan internashonal tokante e kantidat di piská ku mag kue.
Piskadónan lokal ta indispensabel
LVV ta enfatisá kon balioso aporte di e piskadónan ta. Pa medio di huntu kolektá informashon, ta bira evidente kiko realmente ta pasando riba laman. E informashon akí ta hopi nesesario pa evitá sobrepeska i pa prepará e sektor pa e siguiente generashon. ‘Sin informashon konfiabel nos no por yuda piskamentu bai dilanti’, segun un bosero di LVV. ‘Pa e motibu akí nos ta agradesido na tur piskadó i tur esnan presente pa nan dedikashon i embolbimentu.’
Traha huntu riba un futuro ku piská
Ku e investigashon akí Boneiru ta pone un paso importante. No solamente pa protehá nos propio kantidat i populashon di piská, pero tambe pa sòru ku piskamentu ta keda un fuente di entrada stabil i hustu pa e próksimo añanan.
Den e periodo binidero ta sigui mas informashon i momentunan nobo pa hasi midimentu. E piskadónan ku ke partisipá, por mèldu serka LVV.
