Kolegio Ehekutivo di Boneiru ta intervení na e sitio di depositá shushi di SELIBON na Lagun. Pa mas tardá 1 di sèptèmber 2025 SELIBON mester tin tur pèrmit nesesario kla. Si esaki no sosodé, e ora ei ta sigui medida, i asta lo por stòp e sitio di depositá shushi di funshoná.
Hopi aña sin e pèrmitnan korekto
Pa hopi tempu kaba nan ta hasi uso di e sitio di depositá shushi na Lagun sin e pèrmitnan rekerí. Esaki ta konta pa tantu bashamentu di shushi komo pa almasenamentu di zeta shushi. Un situashon indeseá, segun opinion di Kolegio Ehekutivo. ‘Nos tin ku mantené e reglanan ora ta trata di nos propio kompanianan di gobièrnu tambe,’ segun direktorado di Supervishon i Mantenshon di Lei.
A bira tempu pa aktua
Dia 28 di febrüari a manda un karta ofisial pa SELIBON. E tarea ta klarito: pone tur kos na òrdu promé ku 1 di sèptèmber. Pa esaki den sierto kasonan tin mester di un investigashon amplio di medio ambiente (MER). Esaki ta tuma tempu, pero Boneiru a warda hopi kaba. Te e fecha ei Supervishon i Mantenshon di Lei ta tene supervishon èkstra na e sitio. ‘Nos ke mira ku di bèrdat ta atendé ku e asuntu akí,’ segun e direktorado.
Retraso debí na ‘indeplaatsstelling’
Anteriormente e kompetensianan tabata temporalmente den man di Representante di Reino, pa medio di un asina yamá ‘indeplaatsstelling’ (= un otro partido ta tuma e responsabilidatnan over). Pero entretantu wes a anulá esaki. Awor akí Kolegio Ehekutivo ta kompletamente na turno atrobe pa aktua i e ta atendé ku ful forsa ku e asuntu akí.
Un liña klarito
Ku e ultimátum akí Kolegio Ehekutivo ta mustra ku e reglanan no ta sin ningun kompromiso. Kompanianan di gobièrnu tambe mester kumpli ku lei. Solamente di e manera akí nos ta sòru pa un ambiente di biba seif i limpi pa tur hende na Boneiru.
