Na lèntfel Lagun nan a konstatá diferente foko di kandela bou di tera. Esakinan por plama sin hende ripará i nan ta forma un riesgo pa e bisindario i pa nos medio ambiente. Pa e motibu akí Selibon i Entidat Públiko Boneiru dia 18 di mart a kuminsá ku un aserkamentu dirigí pa haña e kandela bou di kontròl. Den e siman tras di lomba e eksperto riba tereno di lèntfel Afvalzorg un biaha mas a identifiká e sitionan. A base di esaki nan a formulá un plan kaminda ta atendé na promé lugá ku e sitionan ku ta forma e riesgo di mas grandi. E fokonan di kandela ta situá den vários sup-área i nan por ta den konekshon ku otro. Esaki ta rekerí un aserkamentu paso pa paso repartí atraves di vários dia.
Durante e trabounan nan ta koba i habri e tereno lokalmente, nan ta paga e kandelanan i despues ta tapa nan atrobe. Nan ta traha entre 08.00 or i 15.00 or, kaminda ta hasi uso di entre otro un trùk di awa i material pa tapa pa tene e situashon bou di kontròl i pa evitá plamamentu.
Aunke ta ehekutá e trabounan kuidadosamente, temporalmente por surgi molèster, manera huma òf holó malu. Hendenan ku ta eksperensiá molèster, por tuma kontakto ku Entidat Públiko Boneiru via + 599 777 2243.
Na mes momentu Entidat Públiko Boneiru ta traha huntu ku Selibon i Afvalzorg riba un aserkamentu struktural. Kontinuamente ta monitoreá e lèntfel, tambe ora no tin kandela visibel. Ku ayudo di un ‘dashboard’ spesial ta vigilá e diferensianan den temperatura i e riesgonan ku tin, di manera ku por intervení mas rápidamente i ku por atendé na tempu ku fokonan nobo di kandela.
Ku e aserkamentu akí nos ta trahando pa logra un situashon ku ta mihó manehabel na lèntfel i pa redusí riesgo pa e bisindario.
