Nos ta biba di naturalesa

Na Boneiru nos no ta biba banda di naturalesa, pero meimei di dje. Tòg tin ora nos ta lubidá esaki. Ku e kampaña di konsientisashon Nos ta biba di naturalesa nos ta mustra kon estrechamente nos bida ta konektá ku naturalesa di nos isla.

Tur hende konosé e momentu partikular ei: bo ta para ketu un ratu, wak rònt i bo ta sinti kon grandi i pegá serka bo naturalesa ta. E solo ku ta sali riba Wasao, e laman ku ta hala rosea trankil asina ku bahada di solo, òf e shelu yen di strea ku ta laga un silensio baha riba bo. E momentunan akí di asombro ta rekordá nos ku nos ta parti di naturalesa i ku nos tambe ta karga responsabilidat pa konserv’é.

Esensia di e kampaña

Nos antepasadonan literalmente tabata biba di loke naturalesa tabata duna nan: solo, awa, aire i tera. Awor akí tampoko esei no a kambia. Nos ta biba di naturalesa. Di e piskánan den laman, di kosecha di nos kunuku i di energia di solo i bientu. Naturalesa ta alimentá nos, protehá nos i e ta tene nos isla den ekilibrio.

Ku e kampaña di Nos ta biba di naturalesa nos ta mustra ku tin ora muchu tiki biaha nos ta para ketu na esei. Nos ta gosa di e bunita bista, di e silensio òf di un brisa fresku, pero nos ta lubidá kon nos ta dependé di nan tur dia. Turista ta bin akí pa nos refnan i nos flamingonan, piskadónan ta saka nan piskánan for di laman, i kunukeronan ta planta bèrdura i fruta riba nos tera. 

Pa e motibu akí asombro ta e punto di salida di nos kampaña. Pasobra esun ku no ta keda asombrá, no ta realisá ku nos ta forma parti di algu hopi mas grandi. I ta te e ora ei nos ta mira bon kla: nos ta biba di naturalesa.

Na unda bo ta mira e kampaña

Por mira imágennan di e kampaña tur kaminda den luna di òktober, novèmber i desèmber: den korant, riba ‘billboard’ digital, riba pantaya ‘indoor’, riba ‘online banner’ i den bo ‘social feed’. Kada imágen ta mustra un momentu di asombro: hende i naturalesa ku ta konektá ku otro.

Kon bo por partisipá

Tur hende por kompartí un propio momentu di asombro. Entre 13 di òktober i 14 di novèmber nos tin nos ‘video challenge’. Partisipá pa medio di hasi un grabashon kòrtiku den naturalesa, den medio ambiente òf den agrikultura di Boneiru, kaminda bo mes ta bisa òf grita: “Nos ta biba di naturalesa”.

‘Like’ nos página di Facebook, ‘upload’ bo video i ‘tag’ nos, di manera ku esaki ta bira visibel. E kuater videonan ku mas tantu ‘like’ ta gana un pakete úniko di NTBDN: un tishùrt spesial, un ‘notebook’ ku ta pas serka e tishùrt i un pèn trahá di plèstik ku nan a saka for di oséano i resiklá.

Banda di esaki bo por partisipá normalmente tambe pa medio di para ketu na bo propio momentunan di asombro. Wak rònt, kompartí loke ta konmoví bo, i deskubrí e proyektonan riba nos wèpsait ku nos ta trahando huntu riba nan. Via Facebook i Youtube bo ta sigui tur e storianan ku ta pertenesé na e kampaña akí.